ސަރުކާރުގެ ވިސްނުމަކީ ހުރިހާ ކޯޓާއެއް ހައްޖު ކޯޕަރޭޝަނަށް ދިނުން ކަމަށް އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
"ޕީއެސްއެމް" ގެ ޕްރޮގްރާމެއްގައި ވާހަކަދައްކަވަމުން މިނިސްޓަރ ޑރ.ޝަހީމް ވިދާޅުވީ، ހައްޖަށް ގެންދިއުމަށް ކޯޓާއަށް ބޮޑު އަގުގައި ފައިސާ ނަގާ މައްސަލައާ ގުޅޭގޮތުން މަޝްވަރާ ކުރަމުންދާ ކަމަށާއި، ސަރުކާރުގެ ވިސްނުމަކީ އެ މަސައްކަތް އަމިއްލަ ކުންފުނިތަކަށް ދޫކުރުމުގެ ބަދަލުގައި، ޙައްޖު ކޯޕަރޭޝަންގެ ދަށަށް މުޅިން ބަދަލުރެއްވުން ކަމަށެވެ.
ރާއްޖެއަށް ލިބޭ ހައްޖު ކޯޓާ އިތުރު ކުރުމާ ގުޅޭ މަޝްވަރާތައް ރައީސް ޑރ.މުހައްމަދު މުއިއްޒު ވަނީ މިހާރުވެސް ފަށްޓަވާފައި ކަމަށާއި، މިގޮތުން ރައީސްގެ ހުވާ ކުރެއްވުމުގެ ރަސްމިއްޔާތަށް ވަޑައިގެންނެވި ސައުދީ އަރަބިއްޔާގެ ވަފްދާވެސް އެކަމާ ގުޅޭގޮތުން ވާހަކަތަކެއް ދެކެވުނު ކަމަށްވެސް މިނިސްޓަރު ވަނީ ވިދާޅުވެފައެވެ.
ރާއްޖެއަށް މިހާރު ލިބޭ 1،000 ކޯޓާގެ ބަދަލުގައި، އެ އަދަދު 2،000 އަށް އިތުރުކޮށްދެއްވުމަށް މަސައްކަތް ކުރައްވާނެކަމަށް ޑރ.މުއިއްޒު ވަނީ ކުރިން ވިދާޅުވެފައެވެ.
