ރައްޔިތުންގެ މަޖިލީހުގައި ސަރުކާރު ތަމްސީލް ކުރާނީ ޕީޕަލް ނެޝަނަލް ކޮންގްރެސް (ޕީއެންސީ) ކަމަށް ރައްޔިތުންގެ މަޖިލީހުން ކަނޑައަޅައިފިއެވެ.
މަޖިލީހުގެ މިއަދުގެ ޖަލްސާގައި މަޖިލިސް ރައީސް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވީ، މަޖިލީހުގައި ސަރުކާރު ތަމްސީލްކުރާނީ ޕީއެންސީ ކަމަށާއި، އަދި އެ ޕާޓީގެ ޕާލަމަންޓްރީ ގްރޫޕްގެ ލީޑަރަކަށް ފެލިދޫ ދާއިރާގެ މެމްބަރު ފަޒުލް ރަޝީދު ހަމަޖައްސާފައިވާ ކަމަށެވެ.
ރައީސް ޑރ.މުހައްމަދު މުއިއްޒުގެ ސަރުކާރާ ގުޅިވަޑައިގަތުމަށް ޕީޕީއެމް/ޕީއެންސީ ކޯލިޝަންގައި ހިމެނޭ ހަ މެމްބަރަކު އިސްތިއުފާ ދެއްވާފައިވާއިރު، މިހާރު ޕީޕީއެމް ތަމްސީލް ކުރައްވަން މަޖިލީހުގައި ތިއްބެވީ ދެ މެމްބަރުންނެވެ. އަދި ޕީއެންސީ ތަމްސީލްކުރައްވަންވެސް ތިއްބެވީ ދެ މެމްބަރުންނެވެ. އަދި އެމްޑީޕީ ތަމްސީލްކުރައްވަން 56 މެމްބަރުން ތިއްބެވިއިރު، ޑިމޮކްރެޓްސް ތަމްސީލް ކުރައްވަން 13 މެމްބަރުން ހިމެނެއެވެ.
