މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯއަކަށް އައްޔަން ކުރެއްވި މުހައްމަދު ވަޖީހުއަށް އެ ކުންފުނީގެ މުވައްޒަފުން ހޫނު މަރުހަބާއެއް ކިޔައިފިއެވެ.
އެމްޕީއެލްގެ ސީއޯގެ މަގާމާ ހަވާލުވެވަޑައިގަތުމަށްފަހު، ވަޖީހު މިއަދު ހެނދުނު ރަސްމީކޮށް އޮފީހަށް ނިކުމެވަޑައިގެންފައިވާއިރު، އެމްޕީއެލްގެ ހެޑް އޮފީހުން ވަޖީހުއަށް މަރުހަބާ ދެންނެވުމަށް ކުންފުނީގެ ޗެއާމަން ކެޕްޓން މުހައްމަދު ޝަރީފާއި ކުންފުނީގެ އިސް މެނޭޖްމަންޓާއި ގިނަ އަދަދެއްގެ މުވައްޒަފުން ބައިވެރިވިއެވެ.
ވަޖީހު ވަނީ މިއަދު އެމްޕީއެލްގެ ޑިޕާޓްމަންޓްތަކުގެ ވެރިންނާއި ސީނިއާ މުވައްޒަފުންނާ ބައްދަލުކުރައްވާފައި ކަމަށް އެ ކުންފުނިން ބުނެއެވެ.
މީގެ ކުރިން ވަޖީހު ވަނީ އެމްޕީއެލްގައި 2013 އިން 2022 ވަނަ އަހަރުގެ މާޗުގެ ނިޔަލަށް މަސައްކަތް ކުރައްވާފައެވެ. އެ މުއްދަތުގެ ތެރޭގައި އެސިންޓަންޓް ސީއީއޯގެ މަގާމާއި ޖެނެރަލް މެނޭޖަރުގެ މަގާމް އަދި އެސިސްޓެންޓް ޗެއާމަންގެ މަގާމު ވަޖީހު ވަނީ ފުރުއްވާފައެވެ.
