އދ.ދިގުރަށުގައި ވިހެއުމަށްފަހު ކޮތަޅަކަށް ލައި އެއްލާލާފައި އޮތް ތުއްތު ކުއްޖާގެ މައްސަލައިގައި އަންހެނަކު ހައްޔަރުކޮށްފިއެވެ.
ފުލުހުން ބުނީ، މަރުވެފައި އޮތް ތުއްތު ކުއްޖާ ދިގުރަށުގެ ކުނިގޮނޑުން ފެނިފައިވާކަމުގެ މަޢުލޫމާތު މިއަދު ހެނދު 09:20 އެހާކަންހާއިރު ލިބިފައިވާ ކަމަށާއި، މިމައްސަލައާ ގުޅިގެން ފުލުހުންގެ ޓީމެއް އެރަށުގައި ދަނީ ހަރަކާތްތެރިވަމުން ކަމަށެވެ.
މި މައްސަލައާ ގުޅިގެން 30 އަހަރުގެ ސްރީލަންކާ އަންހެނަކު ކޯޓު އަމުރެއްގެ ދަށުން މިއަދު ވަނީ ހައްޔަރު ކުރެވިފައި ކަމަށާއި، އޭނާ ހައްޔަރު ކޮށްފައި ވަނީ ދިގުރަށުން މިއަދު މާލެ އައިސް، ސްރީލަންކާއަށް ފުރަން ގޮސް ހުއްޓައި ވެލާނާ އިންޓަނޭޝަނަލް އެއާޕޯޓުން ކަމަށް ފުލުހުން ބުނެއެވެ. އަދި މި މައްސަލަ ތަހުގީގު ކުރަމުން އަންނަ ކަމަށްވެސް ފުލުހުން ބުނެއެވެ.
