ރައްޔިތުންނަށް ބޭނުންޖެހޭ ކޮންމެ ހިނދެއްގައި ސްޓެލްކޯގެ މުވައްޒަފުން ކުރާ އިޖުތިމާޢީ ޚިދުމަތަށް އެ ކުންފުނީގެ އެމްޑީ ޙުސައިން ފަހުމީ ތަޢްރީފްކުރައްވައިފިއެވެ.
ފަހުމީ މިހެން ވިދާޅުވީ، މިހާރު ކުރަމުންދާ ވިއްސާރައާއި ގުޅިގެން، ރަށުގައި ފެންބޮޑުވާ މަގުތަކުގައި ފެންހިންދުމަށް ޖަންކްޝަން ހެދުމުގެ މަސައްކަތް ކުރިއަށް ގެންގޮސްފައިވާކަމާއި، އެފަދަ ކަންކަމުގައި ސްޓެލްކޯގެ މުވައްޒަފުންގެ ފަރާތުން ލިބޭ އެއްބާރުލުން ފާހަގަކޮށް، އޮމަދޫ ކައުންސިލުން ކުރި ޕޯސްޓަކާއި ހަވާލާދެއްވައެވެ.
ފަހުމީ ވިދާޅުވީ، ސްޓެލްކޯގެ ޚިދުމަތްތެރި އަދި ޤައުމަށް ލޯބިކުރާ މުވައްޒަފުންނަށް ހިތުގެ އަޑިން ޝުކުރު އަދާކުރައްވާ ކަމަށާއި، ރައްޔިތުންނަށް ޚިދުމަތްދިނުމުގައި ސްޓެލްކޯގެ މުވައްޒަފުން ފަސް ނުޖެހޭނެ ކަމަށެވެ. އަދި ސްޓެލްކޯގެ މުވައްޒަފުންނަކީ ކުރާ ކޮންމެ މަސައްކަތެއް އެންމެ ރަނގަޅަށް ކުރާ ނަމޫނާ ބައެއް ކަމަށާއި، ފެންބޮޑުވުމަށާއި، ގުދުރަތީ މުސީބާތަކާއި ގުޅިގެން ހަރަކާތްތެރިވުން ކަމުގައި ވީނަމަވެސް، ސްޓެލްކޯގެ މުވައްޒަފުން އަބަދުވެސް ދައްކަނީ ކެތްތެރިކަމާއި، އޯގާތެރިކަމާއި، ޒިންމާދާރުކަމުގެ ވަރުގަދަ މިސާލުކަމަށެވެ.
އެކި ހާލަތްތަކާއި ގުޅިގެން ރައްޔިތުންނަށް ކުރިމަތިވާ އެކިއެކި ކަންކަމުގައި ސްޓެލްކޯގެ މުވައްޒަފުން އަބަދުވެސް ދަނީ އިސްނަގައި ރައްޔިތުންނަށް އެހީވުމަށް މަސައްކަތް ކުރަމުންނެވެ.
