އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދަށް ތުހުމަތުވާ މައްސަލަތަކުގެ ތަފްސީލުތަކާއެކު އެ ކުންފުނީގެ ކުރީގެ ޗެއާމަން އަހްމަދު ޒުހޫރު ރައީސް ޑރ. މުހައްމަދު މުއިއްޒުއަށް ސިޓީއެއް ފޮނުވި ކަމަށްބުނެ ވާހަކަދެކެވެމުންދާއިރު އެ ސިޓީ ލިބިވަޑައިނުގަންނަވާ ކަމަށް އެމަނިކުފާނު މިއަދު ވިދާޅުވެއްޖެ އެވެ.
ރައީސް މުއިއްޒު ވިދާޅުވީ، ޒުހޫރު ސިޓީއެއް ފޮނުވިކަމަށް ދެކެވޭ ވާހަކަ އަޑުއެއްސެވި ކަމަށެވެ. ނަމަވެސް ސިޓީއެއް ލިބިވަޑައިގެންފައި ނުވާ ކަމަށާއި ސިޓީ ލިބުނުނަމަ ޔަގީންނުންވެސް އެކަން ބައްލަވާނެ ކަމަށް ރައީސް ވިދާޅުވި އެވެ.
ކޮރަޕްޝަންގެ އަމަލެއް ނުވަތަ ގަވައިދާ ހިލާފަށް ކުރާ ކަމެއް ހުއްޓުވުމަށް ފަސް ނުޖެހޭނެ ކަމަށް ރައީސް ވިދާޅުވި އެވެ. އަދި މިހާތަނަށް ވެސް އެފަދަ ކަންކަމަށް ފިޔަވަޅު އެޅުމަށް ކަމާބެހޭ ފަރާތްތަކަށް ދަނަންވާފައި ވާނެ ކަމަށްވެސް ވިދާޅުވި އެވެ. ރައީސް މުއިއްޒު ވިދާޅުވީ، ބޭނުންވަނީ ސަރުކާރަކީ ކޮރަޕްޝާނާއި ފަސާދައިން ދުރުވެފައިވާ ސަރުކާރަކަށް ވާން ކަމަށާއި ވައުދުވީވެސް އެގޮތަށް ކަމަށެވެ.
މީގެއިތުރުން ވާހަކަ ދައްކަވަމުން ރައިސް މުއިއްޒު ވިދާޅުވީ، ސަރުކާރުގެ އެއްވެސް ތަނެއްގައި ޤާނޫނާއި ގަވައިދާއި ހިލާފު އެއްވެސް ކަމެއް އެއްވެސް މީހަކު ހިންގަން ބޭނުންނުވާ ކަމަށެވެ. އަދި މަގާމުތަކަށް މީހުން ލަނީ ވައްކަންކުރާކަށް ނޫން ކަމަށާއި އަދި ކޮރަޕްޝަން ހިންގާ ގަވައިދާ ހިލާފު ކަމެއް ކުރަންވެސް ނޫން ކަމަށް ވިދާޅުވި އެވެ.
