ސުޕްރިޑެންޓް އޮފް ޕޮލިސް ރަޖުނީ ޝުއައިބުއަށް ވިނަރެސް ހައުސިން މަޝްރޫއިން ފްލެޓެއް ލިބިފައިވަނީ އުސޫލާ ހިލާފަށް ނޫންކަމަށް ފުލުހުން ބުނެފި އެވެ.
ފުލުހުންގެ އިކޮނޮމިކް ކްރައިމް އިންވެސްޓިގޭޝަންގެ ހެޑްގެ މަގާމުގައި މަސައްކަތްކުރައްވަމުން ގެންދަވާ ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބު ކުރައްވަމުން ގެންދެވި މަސައްކަތްތައް ވަގުތީގޮތުން އެހެން ފަރާތަކާއި ހަވާލުކޮށްފައިވަނީ، ރަޖުނީއަށް ނުގަވާއިދުން ވިނަރެސް ފުލެޓެއް ދީފައިވާ ކަމުގެ ތުހުމަތުތައް ސޯޝަލްމީޑިއާގައި ކުރެވެމުންނެވެ. މިވާހަކަތައް ސޯޝަމްމީޑީއާގައި ފެތުރުނީ އެޗްޑީސީގެ ކުރީގެ އެމްޑީ އިބްރާހިމް ފަޒުލް ރަޝީދުގެ މައްސަލައިގެ ތެރެއިންނެވެ.
ރަޖުނީ މަސައްކަތުން އެކަހެރި ކުރި ސަބަބުގެ ގޮތުން ފުލުހުން އޭރު ބުނެފައިވަނީ، އެ ނިންމުމަކީ އިކޮނޮމިކް ކްރައިމް އިންވެސްޓިގޭޝަންސްގައި މިވަގުތު ކުރަމުންގެންދާ ބިންވެރިޔާ އަދި ގެދޮރުވެރިޔާ ސްކީމާގުޅޭ ތަހުގީގުގެ ކްރެޑިބިލިޓީ ހިފެހެއްޓުމާއި އެ ތަހުގީގަށް އެއްވެސް ކަމަކުން ނުރަނގަޅު އަސަރެއް ނުފޯރާނެކަން ޔަގީންކުރުމަށްޓަކައި ގެނައި ބަދަލެއް ކަމަށެވެ.
މި މައްސަލައިގައި ފުލުހުން މިރޭ ބުނެފައިވަނީ، ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބަށް، ވިނަރެސް ހައުސިން މަޝްރޫއުން އުސޫލާ ހިލާފަށް ފްލެޓެއް ލިބިފައިވާ ކަމަށް ބުނެ އާންމު މީޑިއާގައި ފެތުރުނު މައުލޫމާތާ ގުޅިގެން، ފްލެޓެއް ލިބުމުގައި އެއްވެސް އުސޫލަކާ ހިލާފު އަމަލެއް ހިނގާފައިވޭތޯ ކަމާބެހޭ އިދާރާތަކުން ހިއްސާކޮށްފައިވާ މައުލޫމާތައް ދިރާސާކޮށް ބެލިބެލުމުން އެފަދަ ކަމެއް ފާހަގަކުރެވިފައި ނުވާ ކަމަށެވެ.
ބިންވެރިޔާ ސްކީމަށް ޝަރުތު ހަމަނުވާ ފަޒުލްގެ ބޭބެ މުހައްމަދު ފަޒީލް ރަޝީދުގެ ނަން ލިސްޓުގައި ހިމަނައި އޭނާއަށް ގޯތީގެ ރެޖިސްޓްރީއެއް ހަދައިފައިވާ މައްސަލަ ފެންމަތިވެ އެ މައްސަލައިގެ ތަހުގީގު ފުލުހުން ކުރަމުންގެންދާއިރު މި މައްސަލައާއި ގުޅިގެން ފަޒުލް ވަނީ މަގާމުން އިސްތިއުފާވެސް ދެއްވާފަ އެވެ.
