އަލްހިޖްރަ ގްރޫޕުގެ ހަވާލުގައި އުމްރާއަށްދިޔަ 23 ފަރާތަކަށް އެނބުރި ރާއްޖެ ނާދެވި ހާލުގައި ޖެހުނު މައްސަލައިގައި އެ ގްރޫޕާއި ދެކޮޅަށް އިސްލާމިކް މިނިސްޓްރީން ފިޔަވަޅު އަޅައިފި އެވެ.
އިސްލާމިކް މިނިސްޓްރީން މިއަދު ބުނެފައިވަނީ، އަލްހިޖްރަ ޓްރެވަލް އެންޑް ޓްއާސްގެ ފަރާތުން 2024 ޑިސެމްބަރު އުމްރާ ދަތުރުގައި ދިއުމަށް ހަމަޖެހިފައިވާ އުމްރާވެރިން ދަތުރަށް ފައިސާ ދައްކާފައިވީނަމަވެސް އެ ފައިސާއިން އުމްރާވެރިންގެ ދެކޮޅު ޓިކެޓު ހަމަނުޖައްސާ އެ ފައިސާ ކުންފުނީގެ އެހެން ކަންކަމަށް ބޭނުންކޮށްފައިވާ ކަމަށް އެ ކުންފުނިން އިއުތިރާފުވެފައިވާ ކަމަށެވެ.
މިކަމުގެ ސަބަބުން ރާއްޖެ ނާދެވި ހާލުގައި ޖެހިގެން އިސްލާމިކް މިނިސްޓްރީގެ އެހީތެރިކަމަށް އެދިފައިވާ 23 އުމްރާވެރިން މިއަދު ހައްޖު ކޯޕަރޭޝަންގެ ބެލުމުގެ ދަށަށް ގެނެވިފައިވާ ކަމަށްވެސް އިސްލާމިކް މިިނިސްޓްރީން މައުލޫމާތު ދީފައިވެ އެވެ.
މި މައްސަލައިގައި އިސްލާމިކް މިނިސްޓްރީން ވަނީ އަލްހިޖްރަ ގްރޫޕަށް 5 ފިޔަވަޅެއް އަޅާފަ އެވެ. އެގޮތުން އުމްރާއަށް މީހުން ގެންދިއުމަށް ދޫކޮށްފައިވާ ހުއްދަ ހިފަހައްޓާ އެ ކުންފުނި ވަނީ 1 ލައްކަ ރުފިޔާއިން ޖުރިމަނާ ކޮށްފަ އެވެ. މީގެއިތުރުން އެ ކުންފުނީގެ އެއްވެސް ހިއްސާދާރެއް ހިމެނޭހެން އެހެން ކުންފުންޏަކަށްވެސް އުމްރާއަށް މީހުން ގެންދިއުމުގެ ހުއްދަ ނުދިނުމާއި، ހާލުގައި ޖެހުނު އުމްރާވެރިން ރާއްޖެ ގެނައުމަށް އިސްލާމިކް މިނިސްޓްރީން ކުރި ހަރަދު އެ ކުންފުނިން ހޯދުމަށްވެސް ވަނީ ނިންމާފަ އެވެ. އަދި އަލްހިޖްރަ ގްރޫޕުން އުސޫލާ ހިލާފުވެފައިވާތީ މިމައްސަލަ ތަހުގީގުކޮށް ޤާނޫނީ ފިޔަވަޅު އެޅުމަށް ފުލުހަށް ހުށަހެޅުމަށްވެސް ވަނީ ނިންމާފަ އެވެ.
އިސްލާމިކް މިނިސްޓްރީން ބުނެފައިވަނީ މި ފިޔަވަޅުތައް އެއްވެސް ފަސްޖެހުމެއްނެތި ތަންފިޒުކުރާނެ ކަމަށެވެ.
