އެމްޑީޕީ ދޫކޮށް ޑިމޮކްރެޓްސް އުފައްދަވައި އެ ޕާޓީގައި އިސްކޮށް ހަރަކާތްތެރިވާ ބައެއް ފަރާތްތައް އަނބުރާ އެމްޑީޕީއަށް ސޮއި ކޮށްފި އެވެ.
ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގެ ފަހުކޮޅު ޕާޓީތެރޭގައި އުފެދުނު ހިޔާލުތަފާތުވުންތަކަށްފަހު ކުރީގެ ރައީސް މުހައްމަދު ނަޝީދަށް ތާއިދުކުރައްވާ ފަރާތްތަކުން ވަނީ އެމްޑީޕީން ވަކިވެ ވަކި ސިޔާސީ ޕާޓިއެއް އުފައްދާފަ އެވެ.
ރައީސް ނަޝީދަށް ތާއީދުކުރާ ފަރާތްތަކުން އިސްވެތިބެ ދަ ޑިމޮކްރެޓްސްގެ ނަމުގައި ސިޔާސީ ޕާޓީއެއް އުފެއްދިއިރު، ޑިމޮކްރެޓްސްއިން ވަނީ ރިޔާސީ އިންތިހާބުގައި އަދި ރައްޔިތުންގެ މަޖިލީހުގެ އިންތިހާބުގައިވެސް ވާދަކޮށްފަ އެވެ. އެހެންނަމަވެސް ރިޔާސީ އިންތިހާބުގައިވެސް އެ ޕާޓީއަށް ކުރިނުލިބުނުއިރު މަޖިލިސް އިންތިހާބުގައިވެސް ޑިމޮކްރެޓްސްއަށް ގޮނޑިއެއް ކާމިޔާބު ކުރެވިފައެއް ނުވެ އެވެ.
އެމްޑީޕީއާ އެނބުރި ގުޅިފައިވަނީ، އެމްޑީޕީގެ ކުރީގެ ނައިބުރައީސް އަދި ޑިމޮކްރެޓްސްގެ ނައިބު ރައީސް މުހައްމަދު ޝިފާޒް، ރިޔާސީ އިންތިހާބުގައި ޑިމޮކްރެޓްސްގެ ކެނޑިޑޭޓްގެ ރަނިންމޭޓް، އެސްޓީއޯގެ ކުރީގެ މެނޭޖިން ޑިރެކްޓަރު ހުސެން އަމްރު އަދި ރައްޔިތުންގެ މަޖިލީހުގެ ކުރީގެ މެންބަރު އަލީ އާޒިމް އެވެ.
ރައީސް މުއިއްޒުގެ ސަރުކާރާ ދެކޮޅަށް ޑިމޮކްރެޓްސް އަދި އެމްޑީޕީ ގުޅިގެން މަސައްކަތް ކުރާކަމުގެ އަޑުތަކެއް ފެތުރިފައިވާއިރު މިމަހުގެ 31 ވަނަ ދުވަހު އެމްޑީޕީން ވަނީ މަގުމަތީގެ ހަރަކާތްތަކަށް ނިކުތުމަށްވެސް ނިންމާފަ އެވެ.
