އައްޑޫ ސިޓީގައި ތަރައްގީ ކުރަމުން އަންނަ ޝަންގްރިއްލާ ރިސޯޓް މި އަހަރު ހުޅުވޭނެ ކަމަށް ޓޫރިޒަމް މިނިސްޓަރު ޑރ.އަބްދުﷲ މައުސޫމް ވިދާޅުވެއްޖެއެވެ.
މިއަދު ރައްޔިތުންގެ މަޖިލީހުގައި ޑރ.މައުސޫމް ވިދާޅުވީ، ޝަންގްރިއްލާ ރިސޯޓް ހުޅުވޭނެ ކަމަށް ފާއިތުވި ދެ އަހަރުވެސް އުންމީދު ކުރެވުނު ކަމަށައި، ނަމަވެސް މި އަހަރު އެތަން ހުޅުވޭނެ ކަމުގެ ޔަގީންކަން އެބަ އޮތް ކަމަށެވެ.
ޑރ.މައުސޫމް ވިދާޅުވީ، ޝަންގްރިއްލާގެ މައްސަލަ ހައްލުކުރަން ވަރަށް ބައިވަރު މަސައްކަތް ކުރެވިފައިވާ ކަމަށައި، މިގޮތުން ކުލި ކުޑަކޮށް ސަރުކާރުގެ ހިއްސާ ދޫކޮށްލަންވެސް މަޝްވަރާ ކުރެވިފައިވާ ކަމަށެވެ.
މިގޮތުން ހިއްސާ ދޫކޮށްލުމުގެ މަޝްވަރާތައް ނިމި، ގޮތްތަކެއް ކަނޑައެޅުނުހާ އަވަހަށް ރިސޯޓް ހުޅުވިގެންދާނެ ކަމަށް ޑރ.މައުސޫމް ވަނީ ވިދާޅުވެފައެވެ.
އައްޑޫ ސިޓީގައި ތަރައްގީ ކުރާ ހަންކެޑެ ރިސޯޓާ ގުޅޭ ގޮތުން ޑރ.މައުސޫމް ވިދާޅުވީ، އެ ރިސޯޓަށް ބޭނުންވާ ފައިނޭންސް ހޯދުމަށް މިހާރު އިއުލާން ކޮށްފައިވާ ކަމަށެވެ.
