ޖޮބް ސެންޓަރު އިދާރާއަކަށް ބަދަލުކުރެއްވުމަށް ރައީސް ސޯލިހު ނިންމެވީ ސެންޓަރުގެ ހިދުމަތް ފުޅާކުރުމަށް ކަމަށް ރައީސް އޮފީހުގެ ތަރުޖަމާން މިއުވާން މުހައްމަދު ވިދާޅުވެއްޖެއެވެ.
މިއުވާން މިހެން ވިދާޅުވީ، ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ކުރެއްވި ޓުވީޓަކަށް ރައްދު ދެއްވަމުންނެވެ.
މެމްބަރު އިމްތިޔާޒް ކުރެއްވި ޓުވީޓެއްގައި ވިދާލުވީ، ޖޮބް ސެންޓަރު އިދާރާއަކަށް ބަދަލުކުރަން މާ އަވަސް ކަމަށާއި، އެމްޑީޕީގެ މެނިފެސްޓޯގައިވާ ވައުދުގެ ވާހަކަ ދައްކާނީ ރިޔާސީ އިންތިހާބުގައި ވޯޓުލާ ދުވަހު ކަމަށް ވިދާޅުވެ، ސުވާލު އުފައްދަވާފައެވެ.
އިމްތިޔާޒްގެ ޓުވީޓަށް ރައްދު ދެއްވައި މިއުވާން ވިދާލުވީ، މެނިފެސްޓޯއާ އެއްގޮތަށް ޖޮބް ސެންޓަރގެ ނަމުގައި އިކޮނޮމިކް މިނިސްޓްރީގައި ޑިޕާޓްމަންޓެއް ގާއިމްކޮށް 17/11/2019 އިން ފެށިގެން ޒުވާނުންނަށް އެ ސެންޓަރުގެ ހިދުމަތް ދަނީ ދެމުން ކަމަށެވެ.
މީގެއިތުރުން މިނިސްޓްރީގެ ބެލުމުގެ ދަށުގައިވާ އިދާރާއަކަށް ޖޮބް ސެންޓަރު ބަދަލުކުރުމަށް ރައީސް ސޯލިހު ނިންމެވީއެ ސެންޓަރުގެ ހިދުމަތް ފުޅާކުރުމަށް ކަމަށްވެސް މިއުވާން ވަނީ ވިދާޅުވެފައެވެ.
