ރާއްޖެއަށް އެތެރެކުރަން އުޅުނު 10.14 ކިލޯގެ މަސްތުވާތަކެތި ކަސްޓަމްސް އިން އަތުލައިގަނެފިއެވެ.
ކަސްޓަމްސް އިން ބުނީ، ވައިގެ މަގުން ޕާކިސްތާނުން ރާއްޖެ އައި ޕާކިސްތާން ފަސިންޖަރެއްގެ ލަގެޖުން މަސްތުވާތަކެތި އަތުލައިގަނެފައިވާ ކަމަށާއި، މިތަކެތި އަތުލައިގަނެފައި ވަނީ ޕާކިސްތާނުގެ ފައިސަލް އާބާދުން ރާއްޖެ އައި ޕާކިސްތާނުގެ އުމުރުން 25 އަހަރުގެ ފަސިންޖަރަކާމެދު ޝައްކު ކުރެވިގެން އޭނާއާ ސުވާލުކޮށް ބަލައިފާސްކުރުމުގެ ތެރެއިން ކަމަށެވެ.
މިގޮތުން ބަލައިފާސްކުރުމުގެ ތެރޭގައި ފެނުނު މަސްތުވާތަކެތި ފުރަތަމަ މަރުހަލާގައި ތަހުލީލުކުރިއިރު މަސްތުވާތަކެތީގެ ބާވަތެއް ކަމަށްވާ ހެރޮއިންއަށް ޕޮޒިޓިވްވެފައިވާ ކަމަށާއި، މިތަކެތީގެ މަގުމަތީ އަގަކީ 13 މިލިއަން ރުފިޔާ ކަމަށް ކަސްޓަމްސްއިން ބުނެއެވެ.
މި މައްސަލަ އިތުރަށް ތަހުގީގުކުރުމަށް އަތުލައިގަތް މަސްތުވާތަކެއްޗާއި، ފަސިންޖަރު ފުލުހުންނާ ހަވާލުކޮށްފައިވާ ކަމަށް ކަސްޓަމްސް އިން ބުނެއެވެ.
