ރައްޔިތުންގެ މަޖިލީހުގެ ރައީސްކަމުން އެމްޑީޕީގެ ރައީސް މުހައްމަދު ނަޝީދު ވަކިކުރަން 50 މެމްބަރުންގެ ސޮއި ހަމަކޮށްފިއެވެ.
މަޖިލީހުގެ ރައީސްކަމުން ނަޝީދު ވަކިކުރަން މިއަދު އެމްޑީޕީގެ ޕާލަމެންޓްރީ ގްރޫޕުން ނިންމާފައިވާއިރު، 50 މެމްބަރުންގެ ސޮއި ހަމަކުރީ ތިން ގަޑިއިރެއްހާއިރު ތެރޭގައެވެ.
"ތޭވީސް" އަށް މައުލޫމާތު ލިބިފައިވާ ގޮތުގައި މަޖިލީހުގެ ރައީސްކަމުން ނަޝީދު ވަކިކުރަން އެމްޑީޕީން 50 މެމްބަރުންގެ ސޮއި ހަމަކޮށްފައިވާއިރު، އޭގެ ތެރޭގައި އެމްޑީއޭގެ ލީޑަރ މީދޫ ދާއިރާގެ މެމްބަރ އަހުމަދު ސިޔާމް މުހައްމަދު ހިމެނިވަޑައިގަންނަވައެވެ.
މަޖިލީހުގެ ރައީސް ކަމުން ނަޝީދު ވަކި ކުރުމަށް މަޖިލީހަށް ހުށަހަޅަން ބޭނުންވާނީ މަޖިލީހުގައި ތިއްބަވާ 87 މެމްބަރުންގެ ތެރެއިން 22 ސޮޔެވެ. އަދި އިތުބާރު ނެތްކަމުގެ މައްސަލަ ފާސް ކުރުމަށް އެ ދުވަހު ޖަލްސާއަށް ހާޒިރުވާ މެމްބަރުންގެ ދެބައިކުޅަ އެއްބައި ވޯޓުން ބޭނުންވާނެއެވެ.
