ރައްޔިތުންގެ މަޖިލީހުގެ ރައީސް އަދި އެމްޑީޕީގެ ކުރީގެ ރައީސް މުހައްމަދު ނަޝީދު އެ ޕާޓީއިން ވަކިވުމާއި ގުޅިގެން އެ ޕާޓީއާއި، ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު އަބްދުﷲ ޖާބިރާއި ގުޅުވައި މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެންބަރު އީވާ އަބްދުﷲ ދެއްކެވި ވާހަކަތަކަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ރައްދުދެއްވައިފިއެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެމްޑީޕީން ވަކިވާން ނިންމާފައިވާކަން އެމަނިކުފާނު ވަނީ އިއްޔެ ފައްޔާޒް އިސްމާއިލަށް ފޮނުއްވެވި ސިޓީއެއްގައި ހާމަ ކުރައްވާފައެވެ. ރައީސް ނަޝީދު ޕާޓީއިން ވަކިވާން ނިންމާފައިވަނީ، އެމަނިކުފާނާއި ދެކޮޅަށް އެމްޑީޕީ ޕީޖީ ގްރޫޕުން އިތުބާރު ނެތް ކަމުގެ މައްސަލައެއް ހުށަހެޅުމާއި ގުޅިގެން މަޖިލިސް ހުއްޓުވާފައި ބޭއްވުމަށް ފަހުއެވެ.
މަޖިލީހުގެ ޖަލްސާތައް ކުރިއަށް ގެންދިޔުން ހުއްޓުވާފައި އޮތުމަށްފަހު، ދައުރު ނިންމާލުމުގެ ގޮތުން މިއަދު ބޭއްވެވި ޖަލްސާގައި ވާހަކަ ދައްކަވަމުން، އީވާ ވަނީ ވަރަށް ބޮޑަށް އެމްޑީޕީއަށް ފާޑުވިދާޅުވެފައެވެ. އަދި، "މިއީ އެމްޑީޕީގެ ނިމުން" ގޮތުގައި ސިފަ ކުރައްވައި، އަހަރެއް ތެރޭ އެމްޑީޕީ ނެތިގެން ދާނެ ކަމަށް ވިދާޅުވެ އީވާ ވަނީ މަލާމާތް ކުރައްވާފައެވެ.
"އަޅުގަނޑަށް ލަފާކުރެވެނީ އަންނަ އަހަރު މި ދުވަސްކޮޅު ބަލާލާއިރު، އެމްޑީޕީ އޮންނާނީ ކާށިދޫ ދާއިރާގެ މެމްބަރު އަބްދުﷲ ޖާބިރުގެ ޗެއާމަން ކަމުގައި ހެން،" މާލާމަތުގެ ރާގަކަށް އީވާ ވިދާޅުވިއެވެ. އީވާ ސިފަ ކުރެއްވީ އެމްޑީޕީގެ ނިމުން އަންނާނީ ޑީއާރްޕީގެ ނިމުންވެސް އައިގޮތަށް ކަމަށެވެ.
MDP welcomes all and the party will ensure that anyone can reach the highest position no matter from which island which house which family. I would urge and welcome @chairmanjabir to join MDP. Gen Z othee Chairman Jabir aa ehku. https://t.co/e5KCbbnhEG
— Fayyaz Ismail (@faya_i) June 22, 2023
އެ ވާހަކަތަކަށް ރައްދު ދެއްވައި އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވީ، އެ ޕާޓީއަކީ އެންމެނަށްވެސް މަރުހަބާ ކިޔާނެ ޕާޓީއެއް ކަމަށެވެ. އަދި އެމްޑީޕީ ވަކި އާއިލާއެއްގެ ވަކިތަކުގެ ތެރޭގައި އޮންނަ އޮތުމަށް އިޝާރާތް ކުރައްވައި ފައްޔާޒް ވިދާޅުވީ، ޕާޓީގެ ތެރެއިން ކޮންމެ ރަށެއްގެ ކޮންމެ އާއިލާއެއްގެ މީހަކަށްވެސް ކުރިއެރުން ލިބޭނެ ކަމަށެވެ. އެއާއެކު، ޖާބިރު އެމްޑީޕީއާ ގުޅިވަޑައިގަތުމަށް ފައްޔާޒް ވަނީ ދައުވަތު ދެއްވައިފަ އެވެ.
ރައީސް ނަޝީދު އެމްޑީޕީއިން އިއްޔެ ވަކިވެވަޑައިގެންނެވި އިރު، އީވާ ހިމެނޭހެން ނަޝީދަށް ތާއީދު ކުރައްވާ އިތުރު 13 މެންބަރަކު ވަނީ އެމްޑީޕީއިން ވަކިވެވަޑައިގެންފައެވެ. އެ ބޭފުޅުން މިހާރު މަސައްކަތް ކުރައްވަނީ 'ދަ ޑިމޮކްރަޓްސް' ނަމުގައި އާ ޕާޓީއެއް އުފެއްދުމަށެވެ.
