ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު އެމްޑީޕީއަށް ސޮއިކޮށްފިއެވެ.
މިއަދު ސޯލްޓް ކެފޭގައި ބޭއްވި ރަސްމިއްޔާތެއްގައި ޖާބިރު އެމްޑީޕީއަށް ސޮއިކޮށްފައި ވަނީ ޕާޓީގެ އިސް ލީޑަރު ރައީސް އިބްރާހިމް މުހައްމަދު ސޯލިހު އާއި ޗެއާޕާސަން ފައްޔާޒް އިސްމާއިލްގެ ހާޒިރުގައެވެ.
އެމްޑީޕީއަށް ސޮއިކުރެއްވުމަށްފަހު ނޫސްވެރިންނަށް މައުލޫމާތު ދެއްވަމުން ޖާބިރު ވިދާޅުވީ، އެމްޑީޕީއަށް ސޮއިކުރެއްވީ ރައީސް ސޯލިހު ދެވަނަ ދައުރަކަށް ހޮވަން ކަމަށާއި، އަދި އެކަމަށް ކުރެވެގެން އޮތް ހުރިހާ މަސައްކަތެއް ކުރާނެ ކަމަށެވެ.
ޖާބިރު އެމްޑީޕީއަށް ސޮއިކުރެއްވުމާ ގުޅޭގޮތުން ނޫސްވެރިންނަށް މައުލޫމާތު ދެއްވަމުން ރައީސް ސޯލިހު ވިދާޅުވީ، ޖާބިރު އެމްޑީޕީއަށް ސޮއިކުރެއްވީ ރަނގަޅު ވަގުތެއްގައި ކަމަށާއި، އިންތިހާބު ކާމިޔާބުކުރަން ޖާބިރުގެ އެހީތެރިކަން އެކި ގޮތްގޮތުން ލިބޭނެ ކަމާމެދު ޝައްކު ނުކުރައްވާ ކަމަށެވެ.
