އެއީ ގިނަ ޕާޓީ އެކުލެވޭ ސިޔާސީ ނިޒާމެއް ފެށީއްސުރެ ދެ ފަރާތަށް ކުޅެމުން އައި ދެ ޓީމެވެ. ސިޔާސީ މައިދާނުގައި ވިއްސަކަށް އަހަރު ހޭދަކުރެވުނު އިރު، އެއް ފަރާތަށް އަރައިގެން ކުޅެން ހަމަ އެއް ފަހަރުވެސް އެއިން ޓީމަކުން ބޭނުމެއް ނުވެއެވެ. ގަބޫލުކުރާ އަސާސީ ކަންތައްތައް ދިމާ ނުވާ ކަމަށްބުނެ، ހިތަށް ފެނުނު ކޮންމެ އެއްޗެއް އިދިކޮޅު ޓީމާއި ދިމާލަށް ގޮވާލަ ގޮވާލަ ތިބޫއެވެ. އެހެންނަމަވެސް، މިއަދު ރައީސް އިބްރާހިމް މުހައްމަދު ސޯލިހްގެ ވެރިކަން ނިމުމަކަށް ގެނައުމަށްޓަކައި، ގުޅިގެން މަސައްކަތް ކުރުމަށް އިދިކޮޅު ޕީޕީއެމް/ޕީއެންސީ ޓީމާއި، އަލަށް އުފެއްދުމަށް މަސައްކަތް ކުރަމުންދާ "ދަ ޑިމޮކްރަޓްސް" އިން ވަނީ އިއްތިހާދުވެ އެކަން އިއުލާންކޮށްފައެވެ.
ދެ ޕާޓީ އެކުގައި މަސައްކަތްކުރުމާ ބެހޭ ގޮތުން ރަސްމީ މަޝްވަރާ ބައްދަލުވުމެއް ފުރަތަމަ ފަހަރަށް އޯޝަން ލައިބްރަރީގައި ބޭއްވުމަށްފަހު ނޫސްވެރިންނާއި ބައްދަލުކުރައްވައި، ދެ ޓީމުން ވެސް ދެއްކީ ތަފާތު މަންޒަރެކެވެ. އިހު ކުރެވުނު ޒުވާބާއި ގޮވުނު އައުގުރާނައިގެ ހަދުމަ ނެތެވެ. މިއަދު އެ ބޭފުޅުން ސިފަ ކުރަނީ ތާރީހީ ދުވަހެއްގެ ގޮތުގައެވެ.
މިއަދުގެ ސައްލާއަށްފަހު ނޫސްވެރިންނާއި ބައްދަލުކުރައްވައި. ނައިފަރު ދާއިރާގެ މެމްބަރު އަހްމަދު ޝިޔާމް ވިދާޅުވީ، "އެކަކު އަނެކަކާ އިންނައިރު ވެސް ދެމީހުން އެއްބަސްވާން އެބަޖެހޭ ދެއްތޯ. ދެ ފަރާތުން އެއްބަސްވާ ކަންކަމާ އެކީގައި މިއުޅެނީ. އެހެންމަ އަޅުގަނޑުމެންނަށް ވެސް މަސައްކަތް ކުރެވޭ ކޮމަން ގްރައުންޑެއް މިހޯދަނީ" ކަމަށެވެ.
ފަހަރުގައި، ލޯބީގެ ގޮތުން ގުޅޭ އެންމެނަށް ގުޅުމުގެ ކުރިން އައުގުރާނަ ގޮވުމަކީ ދުނިޔެ ހިނގާ އުސޫލުކަމަށް ޝިޔާމަށް ގަބޫލުކުރެވިދާނެއެވެ. އެހެންނަމަވެސް، ވަކި ކަހަލަ އައުގުރާނައެއް ގޮވުމަށްފަހު ދެން ލޯބީގެ ގޮތުން ގުޅުމަކީ ބުއްދި ހަމަޖެހޭ ވާހަކައެއް ނޫންކަން ދިވެހިން ދަނެއެވެ. އެއީ، ސަބަބުވެރި އިންސާނެއްގެ ބުއްދިން ވިސްނީމާ ގަބޫލުކުރަން ބޭނުން ނުވިޔަސް ހާމައަށް ފެންނަ ހަގީގަތެވެ.
"ލާދީނީ" ގޮތުގައި ބްރޭންޑް ކުރީ ޕީޕީއެމްއިން
ޕީޕީއެމްގެ ލީޑަރޝިޕް އިން 2013 ވަނަ އަހަރު ވެރިކަމަށް އައީ އޭރުގެ އެމްޑީޕީގެ ކެނޑިޑޭޓް އަދި މުސްތަގްބަލުގައި "ދަ ޑިމޮކްރެޓްސް" ގެވެސް ކެނޑިޑޭޓަށް ވުން ގާތް، ރައީސް މުހައްމަދު ނަޝީދު ބަލިކުރުމަށްފަހުއެވެ. އޭގެ ފަހުން 2018 ވަނަ އަހަރާއި ހަމައަށް، ޕީޕީއެމް އިން ކެނޑިނޭޅި ދެއްކީ އެއް ވާހަކައެކެވެ. ރައީސް ނަޝީދާއި އެމަނިކުފާނު އަރިހުގައި މަސައްކަތް ކުރައްވާ ގިނަ މީހުންގެ ނޭއްގާނީ ވާހަކަތަކެވެ. އެކި ގޮތްގޮތަށް އެކި ރާގު ރާގަށް އެ ވާހަކަ ދެއްކިޔަސް، އަބަދުމެހެން އެއް ލަފުޒެއް ތަކުރާރުކުރަމުންނެވެ. "ލާދީނީ" ބައެއްގެ ގޮތުގައި ބްރޭންޑް ކޮށް، މިހާރު "ދަ ޑިމޮކްރެޓްސް" ގައި ތިއްބެވި ބޭފުޅުންނަކީ ދީނާ ދުރު މީހުންކަމަށް އާންމުންނަށް ވިސްނައިދުނުމުގައި އެންމެ އިސްކޮށް ތިބީ ޕީޕީއެމް/ޕީއެންސީގެ ބޭފުޅުންނެވެ.
"ދަ ޑިމޮކްރެޓްސް" ގެ ރޫހާނީ ލީޑަރު، ރައީސް ނަޝީދު ދިވެހިރާއްޖޭގެ ވެރިކަމަށް އަންނާނެ އެއްވެސް ކަމެއް ނުކުރައްވާނެ ކަމަށާއި، އެފަދަ ކަމެއް ކުރުމަކީ ދީން ދިވެހިރާއްޖެއިން ފޮހެލުން ކަމަށް ބުނެ ވާހަކަ ދެއްކީވެސް އެ ބޭފުޅުންނެވެ. އޭގެފަހުން، 2018 ވަނަ އަހަރު އެމްޑީޕީއާއި އަދާލަތު ޕާޓީ އިން ކޯލިޝަން ހެދުމުން، އެއީ ދީނަށް ގައްދާރުވުން ގޮތުގައި ސިފަ ކުރީވެސް ހަމަ އެ ބޭފުޅުންނެވެ. ދީން ވިއްކައިގެން ސިޔާސީ މަންފާ ހޯދީ "ދަ ޑިމޮކްރެޓްސް" ގެ ބޭފުޅުންނަށް ހިތުހުރި އެއްޗެއް ގޮވާފައެވެ.
"ލާދީނީ" ބައިގަނޑު ސަލަފް ޖަމިއްޔާއަށް އޯކޭ؟
ޖަމިއްޔަތުއް ސަލަފަކީ އަބަދުވެސް ޕީޕީއެމްގެ ދީނީ ވިންގު ގޮތުގައި ގިނަ ބަޔަކަށް އޮތީ ސިފަވެފައެވެ. ޕީޕީއެމްގެ އިސް ބައެއް ބޭފުޅުން ކުރާ ދީނާ ދުރު ކަންކަމަށް ފާޑު ކިޔުމުގެ ބަދަލުގައި، އަބަދުވެސް ފެންނަނީ އެ ބޭފުޅުންނަށް ތާއީދު ކުރާ މަންޒަރެވެ. 2018 ވަނަ އަހަރު އަދާލަތު ޕާޓީއިން އެމްޑީޕީ އާއެކު ކޯލިޝަން ހެދުންވެސް އެ ޖަމިއްޔާއިން އޭރު އިންތިހާއަށް ކުށްވެރިކުރިއެވެ. ޖަމިއްޔާގެ އިސް ބޭފުޅުން ގަބޫލުކުރާ ގޮތުގައި، ރައީސް ނަޝީދާއި އެމަނިކުފާނަށް ތާއީދުކުރާ ބޭފުޅުންނަކީ ދިވެހި ރާއްޖޭގައި 'ވެސްޓަރން ވެލިއުސް' ފަތުރަން މަސައްކަތްކުރާ އައުވާނުންނެވެ.
އެފަދަ އަައުވާނުންނާއި ގުޅިގެން މަސައްކަތް ކުރަން އެ ބޭފުޅުންގެ ހިތް ރުހޭނެތޯ، މިއީވެސް އުފެދޭ ސުވާލެކެވެ. ދިވެހިރާއްޖޭގައި ރާ ވިއްކ،ާ ރިސޯޓް ހިންގުމުގައި އިސްކޮށް މަސައްކަތްކުރާ ގާސިމް އާއި އެކު މަޝްވަރާ ބައްދަލުވުންތައްވެސް މިހާރު ބާއްވާފައިވާއިރު، ދެން އެ ބޭފުޅުން ގުޅޭނީ "ދަ ޑިމޮކްރެޓްސް" އާތޯ އެންމެންވެސް މިތިބީ ބަލާށެވެ. ޕީޕީއެމް/ޕީއެންސީ ބޭފުޅުންނަށް ކީފައިހުރި ހުތުރު އެއްޗިސް ހަނދުމަ ނެތުނު ފަދައިން، ސަލަފަށްވެސް ހަނދާން ނެތޭނީތޯ އިނގޭނީ ބަލަން ތިބީމައެވެ.
ކޮންމެއަކަސް، އައުގުރާނަ ގޮވައި، ލާދީނީ ބައެއްގެ ގޮތުގައި ސިފަ ކުރި ބައިގަނޑާއި މިހާރު ޕީޕީއެމް/ޕީއެންސީ އިން ތިބީ އިންނަން ތައްޔާރަށެވެ. ވަރިވާން ނަގާނީ ކިހާ ދުވަހެއްތޯ އެކި މީހުން އެކި ގޮތަށް ހިސާބު ޖަހަތެވެ.
