ދައުރުން ބޭރުގައި ރައްޔިތުންގެ މަޖިލީހުގެ ޖަލްސާއެއް މާދަމާ ބޭއްވުމަށް މަޖިލީހުގެ އިދާރާއިން ނިންމައިފިއެވެ.
ރައްޔިތުންގެ މަޖިލީހުގެ ކޮމިއުނިކޭޝަން ޑިރެކްޓަރު ހަސަން ޒިޔާއު ވިދާޅުވީ، ދައުރުން ބޭރުގައި މަޖިލީހުގެ ޖަލްސާއެއް ބޭއްވުމަށް މަސައްކަތް ކުރަމުން އަންނަ ކަމަށާއި، މާދަމާ ޖަލްސާ ބޭއްވޭނެ ކަމަށެވެ.
މަޖިލީހުގެ މާދަމާގެ ޖަލްސާއަށް ރައްޔިތުންގެ މަޖިލީހުގެ ދާއިމީ ކޮމިޓީތަކުގައި ހިމެނިވަޑައިގަންނަވާ ސިޔާސީ ޕާޓީތަކަށް ނިސްބަތްވެވަޑައިގަންނަވާ މެންބަރުންނާއ،ި ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރައްވާނެ ގޮތަށް ގެނެވޭ ބަދަލާ ގުޅޭ މައްސަލަ ވަނީ އެޖެންޑާ ކޮށްފައެވެ.
ރައްޔިތުންގެ މަޖިލީހުގެ ޖަލްސާއެއް ދައުރުން ބޭރުގައި ބޭއްވުމަށް ހުށަހަޅާފައި ވަނީ މިދިޔަ ޖޫން މަހުގެ 22 ވަނަ ދުވަހު 29 މެމްބަރުންގެ ސޮޔާއެކު އެމްޑީޕީގެ ޕާލިމަންޓްރީ ގްރޫޕުންނެވެ.
މަޖިލީހުގެ ގަވައިދު ބުނާގޮތުން ދައުރުން ބޭރުގައި ޖަލްސާއެއް ބޭއްވުމަށް ހުށަހަޅާފައިވާނަމަ، 14 ދުވަސް ތެރޭގައި ޖަލްސާއެއް ބާއްވަން ޖެހޭނެއެވެ. މިގޮތުން އަންނަ ބުރާސްފަތި ދުވަހުގެ ނިޔަލަށް އެ 14 ދުވަހުގެ މުއްދަތު ހަމަވާނެއެވެ.
