އެންމެ މެމްބަޝިޕް ބޮޑު ކޯލިޝަނާއެކު އަންނަ ސެޕްޓެމްބަރު މަހުގެ ނުވަ ވަނަ ދުވަހު އޮތް ރިޔާސީ އިންތިހާބު އެއްބުރުން ކާމިޔާބު ކުރެވޭނެ ކަމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އެމްޑީޕީ ގައުމީ މަޖިލީީހުގެ މެނިފެސްޓޯ ޑިސްކަޝަންގައި ވާހަކަދައްކަވަމުން ރައީސް ސޯލިހު ވިދާޅުވީ، އެމްޑީޕީން ރިޔާސީ އިންތިހާބަށް ނިކުންނަނީ މިހާތަނަށް ރިޔާސީ އިންތިހާބަކަށް ނިކުންނަ އެންމެ މެމްބަޝިޕް ބޮޑު ކޯލިޝަނާއެކުގައި ކަމަށާއި، އިންތިހާބު އެއްބުރުން ކާމިޔާބުވާނެކަމުގެ ޔަގީންކަން އެބަ އޮތް ކަމަށެވެ.
"އެމްޑީޕީ އާއި އެމްޑީއޭ އަދި އަދާލަތު ޕާޓީގެ މެމްބަޝިޕް އެއްކޮށްލުމުން 77،700 މެމްބަރުން ހަމަވޭ. އެކީގައި މަސައްކަތް ކުރެވިއްޖެ ނަމަ މިއީ ނިމިފައި އޮތް ކަމެއް" ރައީސް ސޯލިހު ވިދާޅުވިއެވެ.
ކުރިޔަށް އޮތް ރިޔާސީ އިންތިހާބުގައި އެމްޑީޕީއާއެކު ކޯލިޝަން ހަދަން ނިންމާފައި ވަނީ އަދާލަތު ޕާޓީގެ އިތުރުން އެމްޑީއޭއިންނެވެ. މިގޮތުން ތިން ޕާޓީ ގުޅިގެން އަންނަނީ ރިޔާސީ އިންތިހާބަށް. ދުރާލައި ތައްޔާރުވަމުންނެވެ.
