ކުރިއަށް އޮތް ދައުރުގައި، ވ. ތިނަދޫ ކައިރިން ޕިކްނިކް އައިލެންޑެއް ހަމަޖައްސައި، ރަށްގިރުމުގެ މައްސަލަ ހައްލުކޮށް، ސިއްހީ ފަރުވާ ރަށުން ލިބޭނެގޮތް ހަމަޖައްސައި ދެއްވާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވައުދުވެވަޑައިގެންފިއެވެ.
ރިޔާސީ އިންތިހާބުގެ ކެމްޕޭނަށް ރައީސް އިބްރާހިމް މުހައްމަދު ސޯލިހު ވ. އަތޮޅަށް ކުރައްވަމުން ގެންދަވާ ދަތުރުފުޅުގައ،ި މިއަދު ތިނަދޫގައި ބޭއްވި ކަންމަތީ ޖަލްސާގައި ވާހަކަދައްކަވަމުން ރައީސް ވަނީ އެ އަތޮޅަކީ އެހެން ސަރުކާރުތަކުން ބާކީ ކޮށްފައި އޮތް އަތޮޅެއްކަމަށް ވިދާޅުވާ ވާހަކަ ތަކުރާރުކުރައްވާފައެވެ. އެގޮތުން، އަޅާނުލުމުގެ ސަބަބުން ގިނަ ބަޔަކު ތިނަދޫއިންވެސް ހިޖުރަކޮށްފައިވާކަން ރައީސް ވަނީ ފާހަގަކުރައްވާފައެވެ.
ތިނަދޫގެ ރަޖިސްޓަރޑް އާބާދީއަކީ 221 މީހުންނެވެ. އެހެންނަމަވެސް، އެ ރަށުގައި ދިރިއުޅެނީ އެންމެ 75 މީހުންނެވެ. ރައީސް ވިދާޅުވީ، އެއީ ރަށުން އަސާސީ ހިދުމަތް ނުލިބޭތީ ކަމަށެވެ. ތިނަދޫއަކީ ފަތުރުވެރިކަމުގެ ބޮޑު އިކޮނޮމީއެއް އޮތް ރަށެއް ނަމަވެސް، އަސާސީ ހިދުމަތްތައް ނުލިބި އޮތް ރަށެކެވެ. އެގޮތުން، ރަށުގެ ކަރަންޓު މައްސަލައަކީވެސް ހައްލު ނުވެ އޮތް މައްސަލައަކަށްވާއިރު، މިއަދު އެކަން ނިމި ރަށުގެ ކަރަންޓުގެ މައްސަލައަށް ހައްލެއް ހޯދައިދީފައިވާކަން ރައީސް މިއަދު ފާހަގަކުރެއްވިއެވެ.
މީގެއިތުރުންވެސް، ރަށުގެ ފެނާއި ނަރުދަމާގެ މަަސައްކަތްވެސް މިހާރު ކުރިއަށްދާކަމަށާއި، ރިޔާސީ އިންތިހާބުގެ ވޯޓުގެ ކުރިން އެކަންވެސް ނިމޭނެކަމަށް ރައީސް ވަނީ މިއަދު ވިދާޅުވެފައެވެ. އެއާއެކު ރަށަށް އިތުރު އިންވެސްޓްމެންޓް އަންނާނެކަން ރައީސް ވަނީ ފާހަގަކުރައްވާފައެވެ.
ރަށަށް މިވަގުތު ދެން އެންމެ މުހިންމީ ރަށުން ސިއްހީ ހިދުމަތް ލިބޭނެ ގޮތެކެވެ. ވ. ތިނަދޫ ގައި މިވަގުތު ފާމަސީއެއްވެސް ނެތް އިރު، ރައީސް ވިދާޅުވީ އިރާދަކުރެއްވިއްޔާ ވަރަށް އަވަހަށް ރަށުން ޑޮކްޓަރަށް ދައްކައި ބޭސް ލިބޭނެގޮތް ހަމަޖައްސައިދެއްވާނެ ކަމަށެވެ. އަދި، ރަށުގައި ހުރި އިންވެސްޓްމެންޓްތަކާއެކު ލަފާފުރާ އުޅަނދުފަހަރު ގިނަ ނަމަވެސް، ބަނދަރު އެއާއި އަޅާބަލާއިރު ކުޑައެވެ. ރައީސް ވަނީ މިއަހަރު ތެރޭގައި ބަނދަރު ބޮޑު ކުރުމުގެ މަސައްކަތްވެސް ފެށޭނެކަން އިއުލާންކުރައްވާފައެވެ. އެއާއެކު، ރަށްގިރުމުގެ މައްސަލައަށްވެސް ހައްލެއް ހޯދައިދެއްވާނެ ކަމަށް ރައީސް ވިދާޅުވިއެވެ.
މީގެއިތުރުންވެސް، ވ. އަތޮޅުން ޕިކްނިކް އައިލެންޑެއް ހަމަޖައްސައިދެއްވާނެ ކަމަށް ވިދާޅުވާ ވާހަކަ ރައީސް ވަނީ ތަކުރާރުކުރައްވާފައެވެ. މާދަމާ ބާއްވާ އިކޮނޮމިކް ކައުންސިލް ބައްދަލުވުމުގައި އެ ސަރަހައްދުގެ ފަތުރުވެރިކަމާއި ގުޅޭ ބޮޑު މަޝްރޫއަކާއި ގުޅޭ ހުރިހާ ކަމެއް ނިމޭނެކަން ރައީސް ވަނީ ވ.ފެލިދޫއަށް ކުރި ދަތުރުގައިވެސް ފާހަގަކުރައްވާފައެވެ.
