ރާއްޖެ އެތެރެ ކުރަން މަސައްކަތް ކުރި ދެ ކިލޯއަށްވުރެ ގިނަ މަސްތުވާތަކެތި ކަސްޓަމްސް އިން އަތުލައިގަނެފިއެވެ.
ކަސްޓަމްސް އިން ބުނީ، މި މަހުގެ ހަތް ވަނަ ދުވަހު ކުރިއާ މެދުވެރިކޮށް ރާއްޖެ އެތެރެކުރަން މަސައްކަތް ކުރި 2.02 ކިލޯގެ މަސްތުވާތަކެތި އަތުލައިގަނެފައިވާ ކަމަށެވެ.
މި ތަކެތި އަތުލައިގަނެފައި ވަނީ އިނގިރޭސި ވިލާތުން ރާއްޖެ ގެނައި ޕެކޭޖެއްގެ ތެރެއިން މަސްތުވާތަކެތި ހުރި ކަމަށް ޝައްކު ކުރެވިގެން އެ ތަކެތި އިތުރަށް ބެލިއިރު މަސްތުވާތަކެތި ފެނިގެން ކަމަށާއި، ބަލައި ފާސްކުރެވުނު ޕެކޭޖުގައި ހުރި ދެ ޕެކެޓްގެ ތެރެއިން މަސްތުވާތަކެތި ކަމަށް ޝައްކު ކުރެވޭ ތަކެތި ފުރަތަމަ މަރުހަލާގައި މެފްޑްރޯންއަށް ޕޮޒިޓިވްވެފައިވާ ކަމަށް ކަސްޓަމްސް އިން ބުނެއެވެ.
އަތުލައިގަތް މަސްތުވާތަކެތީގެ ބަރުދަން ޕެކިންއާއެކު 2020 ގްރާމް އަރާ ކަމަށާއި، މި ތަކެތީގެ މަގުމަތީ އަގު 3.6 މިލިއަން ރުފިޔާއަށްވުރެ ގިނަ ވާނެ ކަމަށްވެސް ކަސްޓަމްސް އިން ބުނެއެވެ.
މީގެއިތުރުން ކަސްޓަމްސް އިން ބުނީ، މި މައްސަލަ ތަހުގީގު ކުރުމަށް އަތުލައިގަނެފައިވާ މަސްތުވާތަކެތި ފުލުހުންނާ ހަވާލުކޮށްފައިވާ ކަމަށެވެ.
