ކުރިޔަށް އޮތް ދައުރުގައި ދ.މީދޫގެ ބޮޑެތި މަގުތައް ހަދައި، ރަށުގެ ސިއްހީ ހިދުމަތް ރަނގަޅުކޮށް، ރޯހައުސް އަޅައިދޭނެ ކަމަށް އެމްޑިޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރިޔާސީ އިންތިހާބުގެ ކެމްޕޭނަށް މީދޫއަށް ވަޑައިގެން ރަށުގެ ރައްޔިތުންނާ ބައްދަލުކުރައްވާ ރައީސް ސޯލިހު ވިދާޅުވީ، މީދޫއަށް ދިމާވެފައިވާ އެންމެ ބޮޑު މައްސަލައަކީ ބޯހިޔާވެހިކަމުގެ މައްސަލަ ކަމަށާއި، އެ މައްސަލަ ހައްލު ކުރުމަށް ރަށުން ގޯތި ލިބޭނެ މަގު ފަހިކޮށް، ރޯހައުސް ނުވަތަ ފްލެޓް އަޅައިދޭނެ ކަމަށެވެ.
ރަށުން ގޯތި ލިބުމަށް މަގު ފަހިވެގެން އަންނަނީ ލޭންޑް ޔޫޒް ޕްލޭން ފާސްވެގެން ކަމަށާއި، ކައުންސިލުން ލޭންޑް ޔޫޒް ޕްލޭން ފޮނުވުމާއެކު ހަފްތާއެއް ތެރޭގައި އެޕްރޫވްކޮށްދޭނެ ކަމަށް ރައީސް ސޯލިހު ވަނީ ވިދާޅުވެފައެވެ.
މީގެއިތުރުން މީދޫގެ ބޮޑެތި މަގުތައް ޒަމާނީ ފެންވަރަށް ހަދައި، ރަށުގެ ސިއްހީ ހިދުމަތުގެ ފެންވަރު ރަނގަޅުކޮށް، ކޮންމެހެން ބޭނުންވާ ހިދުމަތްތައް ގާއިމުކުރާނެ ކަމަށާއި، އަދި ރަށުގައި އައިސް ޕްލާންޓެއް ބެހެއްޓުމުގެ އިތުރުން ބަނދަރަށް ދިމާވެފައިވާ މައްސަލަތައް ހައްލުކޮށްދެއްވާނެ ކަމަށްވެސް ރައީސް ސޯލިހު ވަނީ ވިދާޅުވެފައެވެ.
