އަންނަ ދައުރުގައި ގދ. ނަޑެއްލާ ގިރާ ސަރަހައްދު ހިމާޔަތްކޮށް، ބަނދަރު ބޮޑުކޮށް، މަގު ހަދައި، ރޯ ހައުސްއާއި، އައުޓްޑޯ ޖިމަކާއި ވޮލީކޯޓެއް އަދި ސްކޫލަށް މަލްޓިޕާޕަސް ހޯލެއް އަޅައިދޭނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞޯލިހު ވައުދުވެވަޑައިގެންފިއެވެ.
ރައީސް މިގޮތަށް ވައުދުވެވަޑައިގެންނެވީ ރިޔާސީ އިންތިހާބަށް ކެމްޕޭން ކުރުމުގެ ގޮތުން ގދ. އަތޮޅަށް ކުރައްވަމުން ގެންދަވާ ދަތުރުގެ ތެރެއިން އެ އަތޮޅު ނަޑެއްލާއަށް ވަޑައިގެން މިއަދު ބޭއްވި ޖަލްސާގައި ވާހަކަފުޅުދައްކަވަމުންނެވެ. އެގޮތުން، އެ ޖަލްސާގައި ރައީސް ވިދާޅުވީ، އުފާވެރި އަމާން ރާއްޖެއެއް ހޯދުމަށް މިކުރާ މަސައްކަތުގައި ނަޑެއްލާ ރައްޔިތުން ތިބީ ފުރިހަމައަށް ބައިވެރިވެގެން ކަމަށެވެ.
ރައީސް ވިދާޅުވީ، 2018 ވަނަ އަހަރު ވެރިކަމާއި ހަވާލުވުމަށް ފަހު ރާއްޖެއަށް މި އަންނަނީ އިންގިލާބީ ބަދަލެއް ގެންނަމުން ކަމަށެވެ. "ކޮންމެ ހިސާބަކަށް ބެލިޔަސް، އަސާސީ ހިދުމަތްތައް ތަފާތު ކުރުމެއް ނެތި މި އަންނަނީ ފޯރުކޮށްދެމުން" ރައީސް ވިދާޅުވިއެވެ. އަދި އިގްތިސާދީ ގޮތުން ރައްޔިތުން ބާރުވެރިކޮށް، ވިޔަފާރިއަށް ފަހި މާހައުލެއް ރާއްޖޭގައި މިހާރު އެބައޮތް ކަންވެސް ރައީސް ފާހަގަކުރެއްވިއެވެ. ކުރިއަށް އޮތް ތަނުގައިވެސް އަމާޒަކީ އުފާވެރި އަމާން ރާއްޖެއެއް ރައްޔިތުންނަށް ހޯދައިދިނުމެވެ. ރާއްޖޭގައި އަމާންކަން ގާއިމްވަމުން އަންނަ ކަމުގެ އެންމެ ބޮޑު ހެއްކެއްގެ ގޮތުން ރައީސް ވިދާޅުވީ، ފާއިތުވި ފަސް އަހަރަކީ އެންމެ ކުށްމަދު 5 އަހަރު ކަމަށެވެ.
ކުރިއަށް އޮތް ދައުރުގައި ނަޑެއްލާއަށް ކޮށްދިނުމަށް ހަމަޖެހިފައިވާ ކަންކަމަށްވެސް ރައީސް ވަނީ ޖަލްސާގައި އަލިއަޅުއްވާލައްވާފައެވެ. އެގޮތުން، ރަށުގެ ގިރާ ސަރަހައްދު ހިމާޔަތްކޮށް ރަށުގެ ބޮޑެތި މަގުތަށް ޒަމާނީ ފެންވަރަށް ހަދައި ތާރު އަޅައިދޭނެކަމަށް ރައީސް ވަނީ ވައުދުވެވަޑައިގެންފައެވެ. އަދި، ބޯހިޔާވަހިކަމަށް ހައްލެއް ހޯދައިދިނުމުގެ ގޮތުން ރޯ ހައުސް އަޅައިދިނުމުގެ އިތުރުން، ޒުވާނުން މުނިފޫހިފިލުވުމަށް އައުޓްޑޯ ވޮލީކޯޓަކާއި ޖިމެއްވެސް އަޅައިދިނުމަށް ނިންމާފައިވާކަން ރައީސް ވަނީ އިއުލާންކުރައްވާފައެވެ. މީގެއިތުރުން، ސްކޫލުގައި މަލްޓި ޕާޕަސް ހޯލެއްވެސް އަންނަ ދައުރުގައި އަޅައިދިނުމަށް ވަނީ ހަމަޖެހިފައެވެ.
ޖަލްސާގައި ރައީސް ވިދާޅުވީ، އެނބުރި 2018ގެ ކުރީގައި އޮތް 5 އަހަރަށް ނުދިޔުމަށްޓަކައި ވޯޓުގެ ބޭނުން ރައްޔިތުން ހިއްޕަވަން ޖެހޭ ކަމަށެވެ. ރާއްޖެއަށް މި އަންނަ ބަދަލު ފެންނަ ކަމަށާއި، އެ ބަދަލާއެކު ކުރިއަށް ވަޑައިގަތުމަށް ރައީސް ވަނީ އެދިވަޑައިގެންފައެވެ.
