އަންނަ ދައުރުގައި ނ. ހެނބަދޫގައި ބިން ބޮޑުކޮށް، މަގު ހަދައި، އައު މިސްކިތަކާއި އޮފީސް ކޮމްޕެކްސްއެއް އަޅައި، ސިއްހ މަރުކަޒުގެ ހިދުމަތް 24 ގަޑިއިރަށް ބަދަލުކޮށްދޭނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞޯލިހު ވައުދުވެވަޑައިގެންފިއެވެ.
ރައީސް މިގޮތަށް ވައުދުވެވަޑައިގެންނެވީ ރިޔާސީ އިންތިހާބަށް ކެމްޕޭން ކުރުމުގެ ގޮތުން ނ. އަތޮޅަށް ކުރައްވަމުން ގެންދަވާ ދަތުރުގެ ތެރެއިން އެ އަތޮޅު ހެނބަދޫއަށްވަޑައިގެން މިއަދު ބޭއްވި ޖަލްސާގައި ވާހަކަފުޅުދައްކަވަމުންނެވެ. އެގޮތުން، އެ ޖަލްސާގައި ރައީސް ވިދާޅުވީ، ހެނބަދޫގައި ރައްޔިތުން ދިރިއުޅޭކަންވެސް އެހެން ސަރުކާރުތަކަށް އިހުސާސު ކޮށްނުލެވޭ ކަމަށެވެ. އެންމެ އަސާސީ ހިދުމަތްތައްވެސް ފޯރުކޮށްދިނީ މި ސަރުކާރުން ކަމަށެވެ. ކުޑަ ޖެޓީއަކާއި ނަރުދަމާވެސް އަޅައިދީފައި އޮތީ އަމިއްލަ ފަރާތަކުން ކަމަށާއި، ފެނާއި ކަރަންޓު ފަދަ އަސާސީ ހިދުމަތްތައްވެސް ސަރުކާރުން ފޯރުކޮށްނުދޭ ކަމަށެވެ.
އިތުރަށް ރައީސް ޞޯލިހު ވިދާޅުވީ، ވެރިކަމަށް އައުމަށްފަހު މަސައްކަތްކުރަންވާނީ ހުރިހާ ރައްޔިތުންނަށްވެސް ފާއިދާވާ ގޮތަށް ކަމަށެވެ. ވަކި ސިޔާސީ ފިކުރަކާއިހުރެ، ވަކި ރަށެއް ބާކީ ނުކުރައްވާނެކަމަށް ވިދާޅުވާ ވާހަކަ ރައީސް ތަކުރާރުކުރެއްވިއެވެ.
އަންނަ ދައުރުގައި ހެނބަދޫއަށް ކޮށްދިނުމަށް ހަމަޖެހިފައިވާ ބައެއް ކަންކަން ފާހަގަކުރައްވަމުން ރައީސް ވިދާޅުވީ، ބިން ބޮޑުކޮށް ބޯހިޔާވަހިކަމުގެ މައްސަލަ ހައްލުކޮށް، މަގުތައް ޒަމާނީ ފެންވަރަށް ހައްދަވައިދެއްވާނެ ކަމަށެވެ. ބޮޑު ހުކުރު މިސްކިތެއް އެޅުމުގެ އިތުރުން، ކައުންސިލް އިދާރާއާއި ކޯޓު އެއްތަން ކުރުމަށް އޮފީސް ކޮމްޕްލެކްސްއެއްވެސް އެޅުމަށް ވަނީ ހަމަޖެހިފައެވެ. އަދި، ސިއްހީ މަރުކަޒުގެ ހިދުމަތް 24 ގަޑިއިރު ލިބޭނެ ގޮތަށް ބަދަލުކޮށްދެއްވާނެ ކަމަށާއި، މިފަދަ ހިދުމަތްތައް ނުލިބި އުފާވެރި އަމާންރާއްޖެއެއް ރައްޔިތުންނަށް ނުހޯދޭނެ ކަމަށެވެ.
ރައީސް ވިދާޅުވީ، 2018 ވަނަ އަހަރާއި އަޅާބަލާއިރު ހެނބަދޫ މިހާރު ބަދަލުވެފައިވާކަމަށެވެ. ހެނބަދޫގެ ރައްޔިތުން ބޭނުންވަނީ ޓެސްޓް ކޮށް ނަތީޖާ ނެރެފައިވާ ސަރުކާރެއް ކަމަށެވެ. އެއީ، މި ސަރުކާރު ކަމަށާއި، އެމްޑީޕީއަށް ދެވޭ ވޯޓަކީ ގެއްލޭނެ ވޯޓެއް ނޫން ކަމަށެވެ.
