އަންނަ ދައުރުގައި ނ. ކެނދިކުޅުދޫގައި މަދުވެގެން 300 ރޯހައުސް ނުވަތަ ފްލެޓް އަޅައި، ގިރާ ސަރަހައްދު ހިމާޔަތްކޮށް، ސްޕޯޓްސް ކޮމްޕްލެކްސްއެއް އަޅައިދޭނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞޯލިހު ވައުދުވެވަޑައިގެންފިއެވެ.
ރައީސް މިގޮތަށް ވައުދުވެވަޑައިގެންނެވީ ރިޔާސީ އިންތިހާބަށް ކެމްޕޭން ކުރުމުގެ ގޮތުން ނ. އަތޮޅަށް ކުރައްވަމުން ގެންދަވާ ދަތުރުގެ ތެރެއިން އެ އަތޮޅު ކެނދިކުޅުދޫއަށް ވަޑައިގެން މިއަދު ބޭއްވި ޖަލްސާގައި ވާހަކަފުޅުދައްކަވަމުންނެވެ. އެގޮތުން، އެ ޖަލްސާގައި ރައީސް ވިދާޅުވީ، ކުރީގެ ސަރުކާރުގައި ރައްޔިތުން އުޅުނީ ވަރަށް ބޮޑު ބިރުވެރިކަމެއްގައި ކަމަށެވެ. އެގޮތުން، އެ ދާއިރާގެ މިހާރުގެ މެންބަރު އީސަ ހިމެނޭހެން ގިނަ ސިޔާސީ އިސް މީހުން ޖަލަށްލައި، ރައްޔިތުންނަށް ބަސް ބުނުމުގެ ހައްގު ނިގުޅައިގަނެފައިވާ ކަމަށެވެ. އެ ހައްގުތަކާއި މިނިވަންކަން ހޯދައިދިނީ މި ސަރުކާރުން ކަމަށެވެ.
އަސާސީ ހިދުމަތްތައްވެސް ގާއިމްކުރަމުން އަންނަނީ މި ސަރުކާރުން ކަން ފާހަގަކުރައްވަމުން ރައީސް ވިދާޅުވީ، ކެނދިކުޅުދޫއަށް ވީ ވައުދުގެ ގިނަ ވައުދުތައް ފުއްދި އަނެއްބައި މަސައްކަތް ކުރެވެމުން އަންނަ ކަމަށެވެ. އެގޮތުން، ޖޫނިއާ ކޮލެޖްގެ މަސައްކަތްވެސް ބަޔަކާއި ހަވާލުކުރެވިފައިވާއިރު، ރައްޔިތުންގެ އެދުމާއި އެއްގޮތަށް ހޮސްޕިޓަލްގެ ބިންގާވެސް އަޅާފައިވާ ކަމަށެވެ. އެ މަސައްކަތް ވަރަށް އަވަހަށް ނިމޭނެ ކަމުގެ އުންމީދު އެބައޮތް ކަމަށް ރައީސް ވިދާޅުވިއެވެ.
އަންނަ ދައުރުގައި ރައްޔިތުން އެންމެ ބޮޑަށް ބޭނުންވަނީ ރޯހައުސް ނުވަތަ ފްލެޓް އެޅުން ކަމަށާއި، އަންނަ ދައުރުގައި މަދުވެގެން 300 ރޯހައުސް ނުވަތަ ފްލެޓް އަޅައިދޭނެ ކަމަށެވެ، ރައީސް ވިދާޅުވީ، އުންމީދަކީ އެ ތަންތަނުން ބޯހިޔާވަހިކަން ހޯދުމުގެ ފުރުސަތު ހުރިހާ ރައްޔިތުންނަށްވެސް ކައުންސިލުން ހުޅުވާލުން ކަމަށެވެ. މީގެއިތުރުންވެސް، ގިރާ ސަރަހައްދު ހިމާޔަތްކުރުމަށް ފުއްޓަރު ފަރާތުގައި ރިވެޓްމެންޓް ޖަހައި، ޒުވާނުންނަށް ސްޕޯޓްސް ކޮމްޕްލެކްސްއެއްވެސް އަޅައިދެއްވާނެ ކަމަށެވެ.
