ސެޕްޓެމްބަރު 9ވަނަ ދުވަހު އޮންނަ ރިޔާސީ އިންތިހާބުގައި އިދިކޮޅު ޕީޕީއެމް-ޕީއެންސީ ކޯލިޝަނުން ކުރިމަތިލައްވާފައިވާ ެކެނޑިޑޭޓް ޑރ. މުހައްމަދު މުއިއްޒުއަކީ "ޕީއެންސީ – ސަލަފް"ގެ ކެނޑިޑޭޓް ގޮތުގައި ސިފަކުރައްވައި އެމްޑީޕީގެ ރިޔާސީ ކެނޑިޑޭޓްގެ ތަރުޖަމާނު މާރިޔާ އަހްމަދު ދީދީ ފާޑުވިދާޅުވެއްޖެއެވެ.
މިއަދު އެމްޑީޕީއިން ބޭއްވި ނޫސްވެރިންގެ ބައްދަލުވުމުގައި ޕީއެންސީ – ސަލަފްގެ ކެނޑިޑޭޓް ގޮތުގައި ޑރ. މުއިއްޒު ސިފަކުރައްވައި މާރިޔާވަނީ ތަކުރާރުކޮށް ވާހަކަދައްކަވާފައެވެ. އެކަމާއި ގުޅިގެން ނޫސްވެރިއަކު ކުރެއްވި ސުވާލަށް ޖަވާބު ދެއްވަމުން މާރިޔާވަނީ، އެގޮތަށް ސިފަކުރައްވާ ސަބަބު ތަފްސީލުކޮށްދެއްވާފައެވެ.
އެގޮތުން، މާރިޔާ ވިދާޅުވީ ރައީސް ޔާމީނަށް ޕީޕީއެމްގެ ކެނޑިޑޭޓް ގޮތުގައި ކުރިމަތި ނުލެއްވޭނޭ ކަން ޔަގީންވުމުން އެމަނިކުފާނު ހުށަހެޅުއްވީ، އެ ކޯލިޝަނުން އިންތިހާބު ބޮއިކަޓް ކުރުމަށް ކަމަށެވެ. ނަމަވެސް، ކޯލިޝަންގެ ފަރާތުން މުއިއްޒު އިންތިހާބަށް ވާދަކުރެއްވުމާއި ގުޅިގެން، ޕީޕީއެމްގެ އިސް ފަރާތްތަކުން މުއިއްޒު އެންޑޯޒް ނުކުރައްވާ ކަމަށް މާރިޔާ ވަނީ ވިދާޅުވެފައެވެ.
" (އެހެންނަމަވެސް) ސަލަފްގެ ހުރިހާ ބޭފުޅުން, ފަހަރަކު ބޭފުޅެއް ވަޑައިގަންނަވަނީ މުއިއްޒުއަށް ތާއީދު ކުރައްވަމުން. އެ ބޭފުޅުން ތާއީދު ކުރައްވައި އެންޑޯޒް ކުރައްވާ ކެންޑިޑޭޓަކީ މުއިއްޒު ކަމަށް ވިދާޅުވަމުން," މާރިޔާ ވިދާޅުވި އެވެ.
މީގެއިތުރުންވެސް، މިއަދުގެ ނޫސްވެރިންގެ ބައްދަލުވުމުގައި މާރިޔާ ވަނީ މުއިއްޒުގެ މެނިފެސްޓޯއެއްވެސް ނެތްކަމަށް ވިދާޅުވެފައެވެ. އެގޮތުން، ދިރާސާތަކެއް ކޮށް ރައްޔިތުން ބޭނުންވާ ކަންކަން މުއިއްޒު އޮޅުންފިލުވާފައި ނެތް ކަމަށާއި، އިންތިޒާމުވެގެން ކެމްޕޭނެއް ކުރައްވާތަނެއް ނުފެންނަ ކަމަށްބުނެ މާރިޔާވަނީ މުއިއްޒުއަށް ބަހުގެ ހަމަލާތަކެއް ވެސް އަމާޒުކޮށްފައެވެ.
"ނެތޭ ބެއްލެވިފައެއް މޮޅަދޫ ރައްޔިތުން ބޭނުންވާ ކަމެއް. އެހެން އެ ވިދާޅުވިއިރު ބަނދަރު ނިމިއްޖެ," މުއިއްޒު މޮޅަދޫއަށް ކެމްޕޭނަށް ވަޑައިގެން އެ ރަށަށް ވެވަޑައިގެންނެވި ވައުދުތަކަށް ފާޑުވިދާޅުވަމުން މާރިޔާ ވިދާޅުވިއެވެ. އެގޮތުން، މޮޅަދޫ ބަނދަރަކީ މި ސަރުކާރުން އެޅި ބަނދަރެއް ކަމަށާއި، އެ ރަށު ބަނދަރު ބޮޑުކުރުމަށް ރައީސް ޞޯލިހު ވައުދުވެވަޑައިގެންފައިވާކަންވެސް މުއިއްޒުއަށް ނޭނގޭ ކަމަށް މާރިޔާ ވަނީ ވިދާޅުވެފައެވެ.
ޖަމިއްޔަތުއް ސަލަފްއިން، ޖަމިއްޔާއެއްގެ ގޮތުގައި އޮވެ ސިޔާސީ ހަރަކާތް ހިންގާކަމަށް މީގެކުރިންވެސް ވަނީ އަޑުފެތުރިފައެވެ. އެ ޖަމިއްޔާގެ ގިނަ އިލްމުވެރިންތަކެއް ވަނީ ޑރ. މުއިއްޒު އެންޑޯޒްކޮށް އެކި ސޯޝަލް މީޑިއާތަކުގައި ލިޔުއްވާފައެވެ. ޖަމިއްޔާއިން ރަސްމީ ސިފައިގައިވެސް މުއިއްޒު އެންޑޯޒް ކުރައްވާނެ ކަމަށް ބެލެވެއެވެ.
