ރިޔާސީ އިންތިހާބަށް ޕީޕީއެމް-ޕީއެންސީގެ ކޯލިޝަން ފަރާތުން ވާދަކުރައްވާ ކެންޑިޑޭޓް ޑރ. މުހައްމަދު މުއިއްޒުގެ މެނިފެސްޓޯގައި އޮށްޓަރު ހުރި އެއްވެސް އެއްޗެއް ނެތްކަމަށާއި، މިނިސްޓަރު ކަމުގައި ހުރެ އެއްވެސް ކަމެއް ނުކުރައްވާ ކަމަށް ވިދާޅުވެ ރައީސް އިބްރާހިމް މުހައްމަދު ސޯލިހު ޑރ. މުއިއްޒުއަށް ވަރަށް ބޮޑަށް ފާޑު ވިދާޅުވެއްޖެ އެވެ.
އިންތިހާބުގެ ކެމްޕޭނުގައި ބ. ފެހެންދުއަށް ވަޑައިގެން ބޭއްވި ޖަލްސާގައި ރައީސް ވިދާޅުވީ، މިހާރު ގުނަމުން މިދަނީ ރިޔާސީ އިންތިހާބުގެ ފަހު ދުވަސްވަރުކަމަށެވެ. މިދުވަސްވަރު ގިނަ ވައުދުތަކެއް ކެނޑިޑޭޓުން ވާނެ ކަމަށާއި، އެހެންނަމަވެސް ކުޑަކޮށްވެސް ބަލާލަން ޖެހެނީ ޕީއެންސީއިން އެ ހުށަހަޅާ މެނިފެސްޓޯގައި ކިޔާ އެއްޗަކަށް ކަމަށެވެ.
އެގޮތުން، ރައީސް ވަނީ މުއިއްޒުގެ ވައުދުތަކަށް ވަރަށް ބޮޑަށް ފާޑުވިދާޅުވެ ބަހުގެ ގިނަ ހަމަލާތަކެއް ފޮނުވާލަާފައެވެ. އެގޮތުން، ޓޫރިޒަމް ސިނާއަތުގައި މަސައްކަތް ކުރައްވާ ގިނަ ބަޔަކާއި އެކު މަޝްވަރާކޮށްގެން މި ސަރުކާރުން ސްކޫލުގެ ބޮޑު ޗުއްޓީއަށް ގެނައި ބަދަލުވެސް މުއިއްޒު ބަދަލުކުރާ ވާހަކަ ދެއްކީ އެއްވެސް ރޭވުންތެރިކަމެއް ނެތިކަމަށް ރައީސް ވަނީ ވިދާޅުވެފައެވެ.
"ހަމަ ނިކުވެ މަޑައިގެން ވިދާޅުވީ، ތިމަންނަ ހަމަ އަންނަ ގޮތަށް އައިސް ބަދަލުކޮށްލާނަމޭ. ޖެހިގެން އައި ދުވަހު ވިދާޅުވީ، ކުރީގަ އޮތް ގޮތަށޭ އޮންނާނީ. އެއްވެސް ބަދަލެއް ނުގެންނާނަމޭ" މިދިޔަ ހަފްތާގައި ކުޑަހުވަދޫއަށް ވަޑައިގެން މުއިއްޒު ދެއްކި ވާހަކަތަކާއި ފާޑުވިދާޅުވަމުން ރައީސް ވިދާޅުވިއެވެ.
އޭގެ އިތުރުންވެސް، ރޭ ޕީއެންސީގެ މެނިފެސްޓޯ އިއުލާންކުރުމަށް ބޭއްވި ޖަލްސާގައި މުއިއްޒު ދެއްކި ވާހަކަތަކަށްވެސް ރައީސް ވަނީ ފާޑުވިދާޅުވެފައެވެ. އެގޮތުން، އަސާސީ ހިދުމަތްތައް ހުރިހާ ރަށެއްގައި ގާއިމް ކުރާ ވާހަކަ މުއިއްޒު ދައްކަވާއިރު، "ކީއްތޯ ކުރީ 7 އަހަރު ޕްލޭނިންގ މިނިސްޓަރަކަށް ހުންނަވައިގެން؟" ރައީސް ސުވާލުއުފެއްދެވިއެވެ. ފެނާއި ނަރުދަމާ އެ ދައުރުގައި ގިނަ ރަށްރަށުގައި މުއިއްޒު ގާއިމްކޮށްދީފައި ނުވާއިރު، ކަރަންޓުގެ ހިދުމަތްވެސް ގިނަ ރަށްރަށް ރަނގަޅަށް ނުލިބޭކަން މުއިއްޒު އަށް އިހުސާސް ނުކުރެވޭ ކަމަށެވެ.
މި ސަރުކާރުން ގޯތި ދިނުމުން އެ ގޯތިތައް ހަދައިދޭނެ ކަމަށް މުއިއްޒު ދައްކާ ވާހަކައަކީވެސް ގަބޫލު ކުރަން ދަތި ވާހަކައެއް ކަމަށް ރައީސް ވިދާޅުވިއެވެ. "ބަލަ ކީއްތޯ ކުރެއްވީ އެމަނިކުފާނު މިނިސްޓަރު ކަމުގައި ހުންނަވައިގެން. ކުރީ ސަރުކާރުން ދިން ގޯތިތަށް ނެގީއޭ. ބަދަލުވެސް ނުދީ. ފްލެޓްތައްވެސް އަނބުރާ ނެގީ"، 2013 ވަނަ އަހަރު ރައީސް ޔާމީންގެ ސަރުކާރުގައި ހައުސިންގ މިނިސްޓަރަކަށް މުއިއްޒު ހުންނަވައިގެން ކުރެއްވި ކަންތައްތަކުގެ ހަނދާން އައު ކުރައްވަމުން ރައީސް ވިދާޅުވިއެވެ. ގުޅީ ފަޅު ހިއްކުމުގެ މަޝްރޫއުއަކީ އޭގެ ކުރިން އެމްޑީޕީ ސަރުކާރުން ކުރި ކަމެއް ކަން ފާހަގަކުރައްވަމުން ރައީސް ވިދާޅުވީ، އެތަން ހިއްކި ފަރާތަށް ލާރިވެސް ނުދޭ ކަމަށެވެ. "މިއަދު އެ ވިދާޅުވަނީ ގެ އަޅައިދޭނަމޭ. ކިހިނެއް ގަބޫލުކުރާނީ" ރައީސް ވިދާޅުވިއެވެ.
ރޭގެ މެނިފެސްޓޯ ލޯންޗިންގ ޖަލްސާގައި މުއިއްޒު ވަނީ ހައުސިންގ ބޭންކެއް ތައާރަފް ކުރާ ވާހަކަވެސް ދައްކާފައެވެ. އެއީވެސް އެމްޑީޕީއިން އިއުލާންކޮށް ނިމިފައި އޮތް ކަމެއް ކަމަށާއި، މެނިފެސްޓޯގައި ހުރީ ހަމައެކަނި ބައެއް ފިލި ބަދަލުކޮށްލާފައި ކަމަށެވެ.
ރައީސް ޞޯލިހު އިތުރަށް ވިދާޅުވީ، ރޭގެ ދެއްކި ވާހަކަ އެމަނިކުފާނު ބަލާލިން ކަމަށާއި އެއްގޮތަކަށްވެސް ނެތް ތާކުންތާކުޖެހޭ އެއްވެސް އެއްޗެއް ނެތް ކަމަށެވެ. ކުރިއަށް އޮތް 5 އަހަރުވެސް ރައްޔިތުންނަށް ހެޔޮ ހިތުން ކަމެއް ކޮށްދޭނެ ޕާޓީއަކީ އެމްޑީޕީ ކަމަށާއި، ކޮންމެ ރަށަކަށް ގޮސް ބެއްލެވި ނަމަވެސް އެކަން ފެނިވަޑައިގަންނަވާނެ ކަމަށެވެ.
