ކުރިޔަށް އޮތް ދައުރުގައި ތ.ވިލިފުށި ރައްޔިތުން ޕިކްނިކް ދިޔުމަށް ކައިރީގައި ރަށެއް ތަރައްގީ ކޮށްދިނުމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހު ވައުދުވެވަޑައިގެންފިއެވެ.
ރިޔާސީ އިންތިހާބުގެ ކެމްޕޭނަށް ވިލިފުއްޓަށް ވަޑައިގެން ރަށުގެ ރައްޔިތުންނާ ބައްދަލުކުރައްވާ ރައީސް ސޯލިހު ވިދާޅުވީ، ވިލިފުށީގެ ރައްޔިތުން ދަތުރު ދިޔުމަށް ކައިރީގައި ރަށެއް ތަރައްގީކުރަން ނިންމާފައިވާ ކަމަށާއި، އަދި އެއާޕޯޓާއި ހޮސްޕިޓަލްގެ މަސައްކަތްވެސް ކުރިޔަށްދާނެ ކަމަށެވެ.
ވިލިފުށީ ހޮސްޕިޓަލްގެ މަސައްކަތަށް ބޭނުންވާ ފަންޑު ހަމަޖެހި، މަސައްކަތް ކޮންޓްރެކްޓް ކޮށްފައިވާކަން ފާހަގަކުރައްވާ ރައީސް ސޯލިހު ވިދާޅުވީ، އެއާޕޯޓްގެ މަސައްކަތަށްވެސް ބޭނުންވާ ފައިސާ ހަމަޖެހި ކޮންޓްރެކްޓްކުރެވިފައިވާ ކަމަށާއި، އީއައިއޭގެ މަސައްކަތް ނިމުމުން މަޝްރޫއުގެ މަސައްކަތް ފެށިގެންދާނެ ކަމަށެވެ. އަދި ވިލިފުށީ ހޮސްޕިޓަލާއި، އެއާޕޯޓްގެ މަސައްކަތް ނިންމާނީ މި ސަރުކާރުން ކަމަށްވެސް ރައީސް ވިދާޅުވިއެވެ.
މީގެއިތުރުން ކުރިޔަށް އޮތް ދައުރުގައި ވިލިފުށީގެ ބަނދަރު ތަރައްގީކޮށް، ރަށުގައި ހޮސްޕިޓަލް ތަރައްގީކުރެވެންދެން ސިއްހީ މަރުކަޒަށް ކުޑަކުދިންގެ ޑޮކްޓަރަކާއި، އަންހެނުންގެ ޑޮކްޓަރެއް ފޮނުވައި، ރަށުގައި ތާރު ނާޅާ ހުރި ހުރިހާ މަގެއްގައި ތާރު އަޅައި ނިންމާނެ ކަމަށެވެ.
