ކުރިއަށް އޮތް ރިޔާސީ އިންތިހާބުގައި އޮތް ހަމައެކަނި ޗޮއިސްއަކީ މިހާރުގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކަމަށް އެމަނިކުފާނުގެ ރަނިންގ މޭޓު އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވެއްޖެއެވެ.
މިރޭ އައްޑޫގައި ބޭއްވި ބޮޑު ޖަލްސާގައި ވާހަކަފުޅު ދައްކަވަން އަސްލަމް ފެއްޓެވީވެސް ވަރަށް ޖޯޝާއެކު "މިކަލަސް އިބޫ ދެނަސް އިބޫ" ވިދާޅުވަމުންނެވެ. އެގޮތުން، ރައީސް ސޯލިހަކީ ރާއްޖޭގެ ދިގު ތާރީހުގައި ރޭވިގެން އިންތިޒާމު ވެގެން މަސައްކަތް ކުރާ ހަމައެކަނި ރައީސް ކަމަށް އަސްލަމްވަނީ ވިދާޅުވެފައެވެ.
"ރައްޔިތުންގެ އިތުބާރަކީ ފައިސާއިން ގަނެވޭ އެއްޗެއްނޫން. އެއީ ރައްޔިތުންނަށް އިހުލާސްތެރި މަސައްކަތެއް ކޮށްދިނީމާ ލިބޭ އެއްޗެއް" އަސްލަމް ވިދާޅުވިއެވެ. އެ އިތުބާރު ރައީސް ސޯލިހު ހޯއްދެވީ، ޒަމާންތަކެއް ވަންދެން ނުލިބި އޮތް އަސާސީ ހިދުމަތްތައް ރައްޔިތުންނަށް ފޯރުކޮށްދީގެންނެވެ. ރައީސް ސޯލިހު ވެރިކަމާއި ހަވާލުވިއިރު، 141 ރަށުގައި ފެނާއި ނަރުދަމާ، 125 ރަށުގައި ބަނދަރު އަޅަން ޖެހިފައި ހުރިކަމަށާއި، އެ ހުރިހާ ރަށެއްގެވެސް މަސައްކަތް ފެށި ނިމެމުންދާކަމަށް އަސްލަމް ވަނީ ވިދާޅުވެފައެވެ.
މީގެއިތުރުންވެސް، ރާއްޖޭގެ އެކި ކަންކޮޅުތަކުގައި 1581 ކްލާސްރޫމް އާއި 78 ރަށެއްގައި ސިއްހީ މަރުކަޒު އަޕްގްރޭޑްކޮށް، 900 ހެކްޓަރުގެ ބިން ހިއްކުން ކުރިއަށް ގެންދަވާކަން އަސްލަމް ފާހަގަކުރެއްވިއެވެ. އަދި، އައްޑޫގައި އެކަނި 124 ކިލޯމީޓަރުގެ މަގު ދަނީ ހަދަމުންނެވެ. މުއިއްޒުގެ 7 އަހަރު ހައުސިންގ މިނިސްޓަރު ކަމުގައި އައްޑޫގައި ހެދީ އެންމެ 300 މީޓަރުގެ މަގެވެ.
ރައީސް ސޯލިހު އައްޑޫއަށް ގެންނަވާ ތަރައްގީ އަޅުވާ ކިޔޭނީ ހަމައެކަނި އިނގިރޭސިން ގެނައި ތަރައްގީއާކަމަށްވެސް އަސްލަމް ވަނީ ވިދާޅުވެފައެވެ. "އިނގިރޭސިން މިތަނުގައި ތިބެގެން ގާއިމްކުރި އިންފްރާސްޓްރަކްޗަރ އަށްވުރެ މާގިނަ ތަރައްގީ ގެންނަވައިފި. ކިރިޔާވެސް ކޮމްޕެއާ ކުރެވެނީ އެ ބޭފުޅުންނާއި" އަސްލަމް ވިދާޅުވިއެވެ. އެހެން ސަރުކާރުތަކުން އައްޑޫއަށް އޮތީ ވަރަށް ބޮޑަށް އިހުމާލުވެފައި ކަމަށެވެ.
އެމްޑީޕީ އުފައްދައިގެން ސިޔާސީ ހަރަކާތުގައި ހުރިހާ މަސައްކަތެއް މި ކުރެވެނީ އުފާވެރި ރާއްޖެއެއް ހޯދުމަށެވެ. އަސްލަމް ވިދާޅުވީ، އެ ތަސައްވަރުގައި ކުލަ ޖެހެމުންދާ މަންޒަރު މިހާރު ފެންނަ ކަމަށެވެ. އައްޑޫ ރައްޔިތުންނަށް ފަހި ދުވަސްތަކެއް ފެންނާނެ ކަމަށް އަސްލަމް ވަނީ ވިދާޅުވެފައެވެ.
