ރިޔާސީ އިންތިހާބުގެ ފުރަތަމަ ބުރުގެ ނަތީޖާ އަނބުރާލައި، ދެވަނަ ބުރު ބޮޑު ތަފާތަކުން ކާމިޔާބު ކުރެވޭނެ ކަމަށް އެމްޑިޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ކެމްޕޭންގެ ހަރަކާތްތެރިންނާއެކު ރައީސް ސޯލިހު ބޭއްވި ބައްދަލުވުމުގައި ވިދާޅުވީ، އިންތިހާބަށް ކުރެވުނު މަސައްކަތަށް ބަލާއިރު ނިކުތް ނަތީޖާއަކީ އެއްގޮތަކަށްވެސް އުންމީދުކުރި ނަތީޖާއެއް ނޫން ކަމަށާއި، ވޯޓުލާންވެސް ގިނަ އަދަދެއްގެ ބަޔަކު ނިކުމެފައިނުވާ ކަމަށެވެ.
މިގޮތުން އަނިޔާވެރިކަމާއި ބިރުވެރިކަމަށް އަނބުރާ ދާން ބޭނުން ނުވާކަން ފާހަގަކުރައްވާ ރައީސް ސޯލިހު ވިދާޅުވީ، ފުރަތަމަ ބުރުގައި ދިމާވި ކަންތަކާ ގުޅިގެން ދިރާސަތައް ހަދައި ބަދަލުތަކެއް ގެނެސްފައިވާ ކަމަށާއި، މާޔޫސްކަން މިހާރު ފަހަތަށް ދޫކޮށްލާފައިވާ ކަމަށެވެ.
ރިޔާސީ އިންތިހާބުގެ ދެވަނަ ބުރުގެ ވޯޓުލުން މި މަހު 30 ވަނަ ދުވަހު އޮންނައިރު، ދެވަނަ ބުރުގައި ވާދަކުރައްވާނީ ރައީސް ސޯލިހު އާއި ޑރ.މުއިއްޒުއެވެ.
