އިންތިހާބުގެ ދެވަނަ ބުރުގައި ޖުމްހޫރީ ޕާޓީއާ އެކު ކޯލިޝަން ހަދަން ޕީއެންސީން ނިންމައިފިނަމަ އެ ޕާޓީގެ ކެންޑިޑޭޓު ޑރ. މުހައްމަދު މުއިއްޒުއަށް ކޮށްފައިވާ ތާއީދު އަނބުރާ ގެންދިޔުމަށް ޖަލުގައި ހުންނެވި އިދިކޮޅު ލީޑަރު އަދި ކުރީގެ ރައީސް އަބްދުالله ޔާމީން އަންގަވައިފި އެވެ.
ގާތްގަނޑަކަށް 5,000 އަށްވުރެ ގިނަ ވޯޓާ އެކު ފުރަތަމަ ބުރުން ކެޓި ގާސިމް ގެންދަވަނީ ކޯލިޝަން ހެދުމުގެ މަޝްވަރާތައް ޕީޕީއެމްއާ އެކު ކުރަމުންނެވެ. އެ މަސައްކަތުގައި މުއިއްޒުގެ ރަނިން މޭޓު ހުސައިން މުހައްމަދު ލަތީފް ހިމެނޭހެން ޕީޕީއެމްގެ އިސް ވަފްދެއް ވަނީ ރޭގެ ވަގުތެއްގައި ސަން އައިލެންޑްގައި ބައްދަލުކޮށްފަ އެވެ.
ކޯލިޝަން ހެދުމުގެ މަޝްވަރާއަށް ޔާމީން އެއްބަސްވެފައިވާ ކަމަށް އިދިކޮޅުން ބުނި ނަމަވެސް ގާސިމްއާ ކޯލިޝަން ހެދުމަށް ޔާމީން ބޭނުން ނުވާ ކަމަށް މުއުތަބަރު ފަރާތަކުން ވަނީ މައުލޫމާތު ދީފަ އެވެ. އަދި, ރޭގެ ބައްދަވުލުމުގެ މައުލޫމާތު ޔާމީނަށް ލިބިވަޑައިގަތުމާ އެކު ދެވަނަ ވިސްނުމަކަށް ވަޑައިގެން ގާސިމްއާ އެކު ކޯލިޝަން ހަދައިފިނަމަ އެމަނިިކުފާނު މުއިއްޒުއަށް ކުރައްވާފައިވާ ތާއިދު ގެންދަވާނެ ކަމަށް ވިދާޅުވި ކަމަށް އިތުބާރު ހުރި މަސްދަރަކުން ކަށަވަރު ކޮށްދެ އެވެ.
އޭގެ މައިގަނޑު ސަބަބެއްގެ ގޮތުގައި ޔާމީން ފާހަގަކުރެއްވީ މިހާރު ވެސް ގާސިމްއަކީ މި ސަރުކާރުގެ ކޯލިޝަން ޕާޓްނަރެއް ކަމަށާއި އަދި ޕީޕީއެމްއާ އެކު މީގެކުރިން ކޯލިޝަން ހެދި ފަހަރު ޖޭޕީގެ ފަރާތުން ކުރިމަތިވި ބޮޑެތި ގޮންޖެހުންތަކެވެ. އޭގެ އިތުރުން, މި އިންތިހާބުގައި ކޯލިޝަނަކަށް އައުމަށް ބޭނުންވާ ވަރަށް ޖޭޕީއަށް ވޯޓު ހޯދިފައިވާ ކަމަށް ޔާމީން ގަބޫލުނުކުރައްވަ އެވެ. އެހެންކަމުން, ޕީޕީއެމްގެ ސަރުކާރަކުން އެއްވެސް ޕަސެންޓެއް ޖޭޕީއަށް ދިނުމަށް ޔާމީން ބޭނުންފުޅު ނުވެ އެވެ.
ކޯލިޝަންގެ މަޝްވަރާތައް ގާސިމް ކުރަމުންދާއިރު އޭނާއާ މިއަދު ހެނދުނު ރައީސް އިބްރާހިމް މުހައްމަދު ސޯލިހު ވެސް ވަނީ ބައްދަލުކުރައްވާފަ އެވެ. ފާހަގަކޮށްލެވޭ ގޮތުގައި މި ވެރިކަމަކީ ގާސިމް ސިޔާސީ ގޮތުން ހައްޔަރުނުކުރާ ހަމައެކަނި ވެރިކަމެވެ. ނަޝީދާއި ޔާމީނާއެކު ގާސިމް ހެދި ކޯލިޝަންތަކުގައި އޭނާގެ މައްޗަށް ޖަލު ހުކުމާއި ބަންދު ޖަހާފައިވެ އެވެ.
