ގާޒާގެ އަލް އަހްލީ އަރަބި ހޮސްޕިޓަލަށް އިޒްރޭލުން ދިން ހަމަލާ ހަރުކަށި އިބާރާތުން ކުށްވެރިކުރާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް ސޯލިހު ކުރެއްވި ޓުވީޓެއްގައި ވިދާޅުވީ، ހޮސްޕިޓަލްތަކާއި ހަނގުރާމަ ނުކުރާ މީހުންނަށް އަމާޒުކޮށް ހަމަލާތައް ދިނުމަކީ ބައިނަލްއަގުވާމީ ގާނޫނުތައް އެއްގޮތަކަށްވެސް ތަންދޭ ކަމެއް ނޫން ކަމަށާއި، އެއީ ވަރަށް ބޮޑަށް ގާނޫނާ ހިލާފު ކަމެއް ކަމަށެވެ.
މިގޮތުން ހަނގުރާމަ ހުއްޓާލުމަށް ބާރު އަޅައި، ގާޒާގެ ރައްޔިތުންނަށް ކުރިމަތިވެފައިވާ ދަތިތައް ހައްލުކޮށް، އެ ގައުމުގެ ރައްޔިތުންނަށް ބޭނުންވާ އިންސާނީ އެހީތެރިކަން ފޯރުކޮށްދިނުމަށްވެސް ރައީސް ސޯލިހު ވަނީ ގޮވާލާފައެވެ.
އިޒްރޭލުން ގާޒާއަށް ދެމުން ގެންދާ ހަމަލާތައް ދިވެހި ސަރުކާރުން ކުށްވެރިކޮށްފައިވާއިރު، އދ. ގައިވެސް ދިވެހި ސަރުކާރުން ވަނީ އިޒްރޭލުން ހިންގާ ގަތުލްއާމާ ދެކޮޅަށް އަޑު އުފުލާފައެވެ.
