ދޫނިދޫ އާއި ފުނަދޫ ދޭތެރޭ ކަނޑުމަތިން މިއަދު ފެނުނު މަރުވެފައި އޮތް މީހާއަކީ ރޭ ރަސްފަންނު ކައިރިން މޫދަށް ފުންމާލި މީހެއްކަން ކަށަވަރުވެއްޖެއެވެ.
އެމްއެންޑީއެފް އިން ބުނީ، ރޭގެ ވަގުތެއްގައި ރަސްފަންނު ކައިރި މޫދަށް ފުންމާލިކަމަށް ބެލެވޭ މީހާ ގެއްލިގެން ހޯދަމުން ދަނިކޮށް، ދޫނިދޫ ކައިރި މޫދުގައި އޮއްވާ ފެނިފައިވާ ކަމަށާއި، އެ މީހާ ގެއްލިގެން އުޅޭކަމުގެ ރިޕޯޓް، އެމްްއެންޑީއެފް ކޯސްޓްގާޑް މެރިޓައިމް ރެސްކިޔު ކޯޑިނޭޝަން ސެންޓަރ (އެމްއާރުސީސީ) އަށް ލިބުނީ، ރޭ 19:54 ހާއިރު ކަމަށެވެ.
މި ރިޕޯޓް ލިބުމާ އެކު އެމްއެންޑީއެފް މާލޭ އޭރިއާ ކޯސްޓްގާޑް ސެކަންޑް ސްކޮޑްރަންއިން ވަނީ ރެއިން ފެށިގެން ހަރަކާތްތެރިވެފައި ކަމަށާއި، މިގޮތުން، އެ މީހާ ހޯދުމުގެ ގޮތުން މިއަދު ހެނދުނު ކޯސްޓްގާޑް ސެކަންޑް ސްކޮޑްރަންގެ ޑައިވަރުން ވަނީ ރަސްފަންނު ކައިރި ކަނޑުއަޑިން 41590 އަކަ މީޓަރުގެ ސަރަހައްދެއް ބަލާފައި ކަމަށް އެމްއެންޑީއެފް އިން ބުނެއެވެ.
ރޭގެ ވަގުތެއްގައި ރަސްފަންނު ކައިރިން މޫދަށް ގެއްލުނު މީހާ ހޯދަމުން ދަނިކޮށް، މިއަދު 09:19 ހާއިރު ދޫނިދޫ ކައިރި މޫދުގައި އޮއްވައި ފެނިއްޖެ. މި މީހާގެ ހަށިގަނޑު އެމްއެންޑީއެފް ކޯސްޓްގާޑް ފަސްޓް ސްކޮޑްރަންއިން މިހާރު ވަނީ މާލެ ގެނެސްފަ.https://t.co/5jFeTeYIew pic.twitter.com/euSUNgj66L
— Maldives National Defence Force (@MNDF_Official) October 19, 2023
މި މީހާގެ ހަށިގަނޑު ފެނިފައިވަނީ، ދޫނިދޫ ކައިރިން ދަތުރުކުރި އެމްޓީސީސީގެ ފެރީގެ ފަޅުވެރިންނަށް ކަމަށްވާއިރު، ހަށިގަނޑު ފެނިގެން އެމްއެންޑީއެފް ކޯސްޓްގާޑަށް ރިޕޯޓްކޮށްފައި ވަނީ މިއަދު ހެނދުނު 09:19 ހާއިރު ކަމަށާއި، އެމްއެންޑީއެފް ކޯސްޓްގާޑް ސެކަންޑް ސްކޮޑްރަންގެ ސިފައިންގެ އެހީތެރިކަމާއިއެކު މި މީހާގެ ހަށިގަނޑު މިހާރު ވަނީ މާލެ ގެނެސްފައި ކަމަށްވެސް އެމްއެންޑީއެފް އިން ބުނެއެވެ.
ފުލުހުހުން ބުނީ، ކަނޑުމަތިން ފެނުނު މީހާގެ ހަށިގަނޑަކީ ރޭ ރަސްފަންނު ކައިރިން މޫދަށް ފުންމާލި މީހާ ކަމަށާއި، އެއީ 41 އަހަރުގެ ދިވެހި ފިރިހެނެއް ކަމަށެވެ. އަދި ހަށިގަނޑު އާއިލާއާ ހަވާލުކޮށްފައިވާ ކަމަށްވެސް ފުުހުން ބުނެއެވެ.
