ރައްޔިތުންގެ މަޖިލީހުގެ ނައިބުރައީސް އިވާ އަބްދުﷲ އާލާސްކަންފުޅާ އުޅުއްވާތީ، މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ މިއަދު ނުބޭއްވޭނެކަން ރައްޔިތުންގެ މަޖިލީހުން އަންގައިފިއެވެ.
އެމްޑީޕީގެ ޕާލިމަންޓްރީ ގްރޫޕުން 49 މެމްބަރުން ސޮއިކުރައްވާ ރައީސް ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅާފައިވާއިރު، އެ މައްސަލައިގައި މިއަދު ގޮތެއް ނިންމަން އޮތީ ނިންމާފައެވެ.
ރައްޔިތުންގެ މަޖިލީހުގެ މިއަދުގެ ޖަލްސާ ފެށުމުގެ ކުރިން އަމީން އާންމު ފާތިމަތު ނިއުޝާ ވިދާޅުވީ، މަޖިލީހުގެ ރައީސްގެ އިތުބާރު ނެތްކަމުގެ މައްސަލަ މިއަދަށް އެޖެންޑާކޮށްފައިވީ ނަމަވެސް، ޖަލްސާގެ ރިޔާސަތު ބެލެހެއްޓުމުގެ ޒިންމާ ހަވާލުވެފައިވާ މަޖިލީހުގެ ނައިބްރައީސް އީވާ އާލާސްކަންފުޅާ އުޅުއްވާތީ މިއަދު ހެނދުނު 06:10 ގައި ސަލާމް ފޮނުވާފައިވާ ކަމަށެވެ.
މަޖިލީހުގެ ގަވައިދު ބުނާ ގޮތުން މަޖިލީހުގެ ރައީސްގެ އިތުބާރު ނެތްކަމުގެ މައްސަލައިގައި ނޯޓިސް ފޮނުވުމަށްފަހު، ބަންދު ދުވަސްތައް ފިޔަވައި އެންމެ އަވަހަށް އޮންނަ ޖަލްސާއަކަށް މައްސަލަ އެޖެންޑާކޮށް ގޮތެއް ނިންމަން ޖެހޭ ކަމަށާއި، މިގޮތުން މާދަމާގެ ޖަލްސާއަށްވެސް ނަޝީދު ވަކިކުރުމުގެ މައްސަލަ އެޖެންޑާ ކުރާނެ ކަމަށް ނިއުޝާ ވަނީ ވިދާޅުވެފައެވެ.
މަޖިލީހުގެ ރައީސްގެ އިތުބާރު ނެތްކަމުގެ މައްސަލައިގައި ގޮތެއް ނިންމުމަށްފަހު ނޫނީ، މަޖިލީހުގެ އެއްވެސް މަސައްކަތެއް ކުރިޔަށް ގެންދިޔުމަށް އެއްބާރުލުން ނުދޭން އެމްޑީޕީ ޕާލިމަންޓްރީ ގްރޫޕުން ވަނީ މިދިޔަ ބުދަ ދުވަހު ނިންމާފައެވެ.
