ރައްޔިތުންގެ މަޖިލީހުގެ ރިޔާސަތުން މިހާރު ފެންނަ އަމަލުތަކަކީ 18 ވަނަ ރައްޔިތުންގެ މަޖިލީހުގައި ފެނުނު ހުދުމުހުތާރުކަން ކަމަށް އައްޑޫ ސިޓީގެ މޭޔަރު އަލީ ނިޒާރު ވިދާޅުވެއްޖެއެވެ.
އަލީ ނިޒާރު ކުރެއްވި ޓުވީޓެއްގައި ވިދާޅުވީ، ރައްޔިތުންގެ މަޖްލިސްގެ ރިޔާސަތުން އެ ފެންނައަމަލު ތަކަކީ 18 ވަނަ މަޖްލިސް އިންވެސް ފެނިދިޔަ ޚުދުމުހުތާރު ސިފަތަކެއް ކަމަށާއި، މަޖްލިސްގެ ގަވާއިދާއި ގާނޫނުން އެފަދަ ފުރުސަތުހަނިކުރުން މުހިއްމު ކަމަށެވެ.
"ނިޒާމް ޑިމޮކްރެޓިކް ވިޔަސް ޕާޓީ އަށްޑިމޮޮޮކްރެޓިކް ކިޔާ ނަންދިނަސް މީހާ ޑިމޮކްރެޓިކް ނުވެދާނެ" އަލީ ނިޒާރު ކުރެއްވި ޓުވީޓުގައި ވިދާޅުވިއެވެ.
ރައްޔިތުންގެ މަޖިލީހުގެ ރައީސްކަމުން މުހައްމަދު ނަޝީދު ވަކިކުރަން 49 މެމްބަރުންގެ ސޮޔާއެކު އެމްޑީޕީން ހުށަހެޅި މައްސަލަ ކުރިޔަށް ނުގެންދެވި މަޑު ޖެހިފައި ވަނީ މަޖިލީހުގެ ނައިބުރައީސް އީވާ އަބްދުﷲ އާލާސްކަންފުޅާ އުޅުއްވާތީ، މަޖިލީހަށް ހާޒިރުވެވަޑައިނުގަންނަވާތީއެވެ. މަޖިލިސް ގަވައިދު ބުނާގޮތުން މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ކުރިޔަށް ގެންދާ ޖަލްސާގައި ރިޔާސަތު ބަލަހައްޓަން ޖެހޭނީ މަޖިލީހުގެ ނައިބުރައީސްއެވެ.
މިކަމާ ގުޅިގެން އެމްޑީޕީން ވަނީ މަޖިލީހުގެ އެއްވެސް މަސައްކަތެއް ކުރިޔަށް ގެންދެވޭނީ ނަޝީދުގެ އިތުބާރު ނެތްކަމުގެ މައްސަލައިގައި ގޮތެއް ނިންމުމަށްފަހު ކަމަށް ބުނެފައެވެ. އަދި އެ ޕާޓީން ވަނީ އެ މައްސަލަ ކުރިޔަށް ގެންދެވޭނެ މަގެއް ހޯދުމަށް ސުޕްރީމް ކޯޓަށްވެސް މައްސަލައެއް ހުށަހަޅާފައެވެ.
