ކުރީގެ ރައީސް އަބްދުﷲ ޔާމީން އަބްދުލްގައްޔޫމް ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން ވަކިވެ އައު ޕާޓީ ރަޖިސްޓްރީކުރަން އާދީއްތަ ދުވަހު ހުށަހެޅުމަށް ނިންމައިފިއެވެ.
ޔާމީންގެ އައު ޕާޓީ ވުޖޫދަށް ގެނައުމުގައި އިސްކޮށް ހަރަކާތްތެރިވާ ކުރީގެ މިނިސްޓަރު މުހައްމަދު މަލީހް ޖަމާލް ވިދާޅުވީ، ޔާމީންގެ އައު ޕާޓީގެ ކަންކަން ބާރަށް ކުރިޔަށްދާ ކަމަށާއި، މިގޮތުން އައު ޕާޓީގެ ލޯގޯ އާއި ކިޔާނެ ނަމެއްވެސް މިހާތަނަށް ނިމިފައިވާ ކަމަށެވެ. އަދި ޕާޓީ އުފެއްދުމުގެ ހުއްދައަށް އާދީއްތަ ދުވަހު އެދޭނެ ކަމަށްވެސް މަލީހް ވަނީ ވިދާޅުވެފައެވެ.
"ޕީޕީއެމްޕީއެންސީގައި މިވަގުތު ތިއްބެވި ރައީސް ޔާމީނަށް ތާއީދުކުރައްވާ އެމަނިކުފާނުދެކެ ނުހަނު ލޯބިވާ މެމްބަރުން އަލަށް އުފައްދާ ޕާޓީއަށް ގުޅިވަޑައިގަންނަވަން އެދި ލައްވަމުން ދާކަމީ އެމަނިކުފާނު ނުހަނު އުފާފުޅުވާކަމެއް. ހުރިހާ ބޭފުޅުން މި ޤައުމީ މަސައްކަތުގައި ބައިވެރިވެލައްވާ" މަލީހް ވިދާޅުވިއެވެ.
ޔާމީން އާ ޕާޓީއެއް އުފައްދަން ނިންމާފައި މިވަނީ ޕީޕީއެމްްގެ އެތެރޭގައި ދިމާވި މައްސަލަތަކާއެކު، ޕާޓީގެ ކޮންޓްރޯލް އެއްކޮށް ގެއްލުމުންނެވެ.
