ސިންގަޕޫރަށް ދިރިއުޅުން ބަދަލުކުރި ކަމަށް މީޑިއާތަކުގައި ފަތުރަމުން އަންނަނީ ދޮގު ހަބަރެއް ކަމަށް ކުރީގެ ނައިބްރައީސް އަދި އެމްޓީޑީގެ ރައީސް އަހުމަދު އަދީބް ވިދާޅުވެއްޖެއެވެ.
އަދީބް މިއަދު ކުރެއްވި ޓުވީޓެއްގައި ވިދާޅުވީ، މިވަގުތު އޭނާ އަންނަނީ ގައުމުން ބޭރުގައި ސިއްހީ ފަރުވާ ހޯދަމުން ކަމަށާއި، ފަރުވާގެ ކަންތައް ނިމުނުހާ އަވަހަކަށް އެނބުރި ރާއްޖެ ވަޑައިގަންނަވާނެ ކަމަށެވެ.
"ދިރިއުޅޭނީ އަހަރެންގެ ގައުމު ދިވެހި ރާއްޖޭގައި. އެއީ އިރާދަކުރެއްވިއްޔާ އަހަރެން މަރުވެ ފަސްދާނުވެސް ލެވިގެންދާނެތަން" އަދީބް ކުރެއްވި ޓުވީޓްގައި ވިދާޅުވިއެވެ.
އެމްއެމްޕީއަރްސީގެ ހިޔާނާތުގެ މައްސަލައިގައި އަދީބުއަށް 31 އަހަރުގެ ޖަލު ހުކުމެއް އިއްވާފައިވާއިރު، ކުރީގެ ރައީސް އިބްރާހިމް މުހައްމަދު ސޯލިހު ވަނީ އަދީބުއަށް މައާފު ދެއްވާ މިނިވަން ކުރައްވާފައެވެ. މައާފް ދެއްވުމަށްފަހު ބޭސް ފަރުވާއަށް އަދީބް ރާއްޖެއިން ބޭރަށް ވަޑައިގެންނެވި ގޮތަށް އަދި ރާއްޖެއަށް ވަޑައިގެންފައެއް ނުވެއެވެ. މީގެ ކުރިންވެސް އަދީބް ވަނީ ބޭސް ފަރުވާއަށް ރާއްޖެއިން ބޭރަށް ވަޑައިގެންނެވުމަށްފަހު އެނބުރި ރާއްޖެ ވަޑައިގެންފައެވެ.
