އދ.ދިގުރަށުގައި ވިހެއުމަށްފަހު ކޮތަޅަކަށް ލައި އެ ރަށު ކުނިގޮނޑަށް އެއްލާލާފައި އޮތް ތުއްތު ކުއްޖާގެ މައްސަލައިގައި ހައްޔަރުކުރި މީހާ ޝަރީއަތް ނިމެންދެން ބަންދުކޮށްފިއެވެ.
ފުލުހުން ބުނީ، ވިހެއުމަށްފަހު ކުއްޖާ މަރާލިކަމުގެ ތުހުމަތުގައި ހައްޔަރުކޮށްފައި ވަނީ ސްރީލަންކާގެ 30 އަހަރުގެ މީހެއް ކަމަށާއި، އޭނާގެ ބަންދާމެދު ގޮތެއް ނިންމުމަށް މިއަދު ކްރިމިނަލް ކޯޓަށް ހާޒިރު ކުރުމުން ޝަރީއަތް ނިމެންދެން ބަންދުކޮށްދީފައިވާ ކަމަށެވެ.
ތުއްތު ކުއްޖާ ދިގުރަށު ކުނި ގޮނޑުން ފެނިފައިވަނީ އިއްޔެ ހެނދުނުގެ ވަގުތެއްގައެވެ. އަދި އެ މައްސަލައިގައި ލަންކާ އަންހެން މީހާ އަތުލައިގަތީ ވެލާނާ އިންޓަނޭޝަނަލް އެއާޕޯޓްގައި ފުރަން ގޮސް ހުއްޓައެވެ.
