މިހާރު ރާއްޖެއަށް ކުރަމުންދާ ވިއްސާރައިގައި ގެއްލުން ލިބުނު ކަމުގެ ރިޕޯޓް 5 ރަށަކުން ކޮށްފައިވާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ އޮފް މޯލްޑިވްސް (އެންޑީއެމްއޭ) އިން ބުނެފިއެވެ.
އެންޑީއެމްއޭ އިން ބުނީ، ވިއްސާރާގައި ގެއްލުން ލިބުނުކަމުގެ ރިޕޯޓުތައް، ފ. ނިލަންދޫ، ކ.ގުރައިދޫ، ލ.ގަން އަދި ފޮނަދޫ އާއި ސ.މަރަދޫއިން ވަނީ ލިބިފައިވާ ކަމަށާއި، އަދި ކ.ގުރައިދޫގެ 20 ގެއެއްގައި ފެންބޮޑުވެ ތިން ގެއަކުން މީހުން އެހެން ތަންތަނަށް ބަދަލުވެފައިވާ ކަމަށެވެ.
ފެން ބޮޑުވުމުގެ ހާދިސާތަކަށް އިޖާބަ ދިނުމުގެ މަސައްކަތް ސިފައިންނާއި، ފުލުހުން އަދި ކައުންސިލްތައް ގުޅިގެން އަންނަނީ ކުރަމުން ކަމަށާއި، މީގެ އިތުރުންވެސް މާލޭގެ ބައެއްގޭގައި ފެންބޮޑުވެފައިވާތީ ވެލި ބަސްތާޖެހުމުގެ މަސައްކަތް ސިޓީ ކައުންސިލްގެ އެހީތެރިކަމާއިއެކު އަންނަނީ ކުރަމުން ކަމަށްވެސް އެންޑީއެމްއޭ އިން ބުނެއެވެ.
މެޓް އޮފީހުން ބުނީ، މިއީ އިރުވައި މޫސުން ފެށޭ ދުވަސްވަރަކު ކުރާ ވިއްސާރައެއް ކަމަށާއި، މޫސުން ދައްކާ ގޮތުން މިއަދާއި މާދަމާ ވެސް މުޅި ރާއްޖެއަށް ވާރޭ ވެހޭނެ ކަމަށެވެ. އަދި ބައެއް ސަރަހައްދުތަކަށް ޔެލޯ އެލާޓް ނެރެފައިވާއިރު، މޫސުމަށް ސަމާލުވުމަށް މެޓް އޮފީހުން އިލްތިމާސް ކުރެއެވެ.
