ޒަކާތާބެހޭ މުސްތަގިއްލު ވަކި މުވައްސަސާއެއްގެ ގޮތުގައި 'ދިވެހިރާއްޖޭގެ ޒަކާތު ހައުސް' ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ރަސްމީކޮށް އިފުތިތާޙުކޮށްދެއްވައިފިއެވެ.
ރާއްޖޭގެ ޒަކާތު ހައުސް ރަސްމީކޮށް ރައީސް ޑރ.މުއިއްޒު އިފުތިތާޙުކޮށްދެއްވީ މިއަދު މިނިސްޓްރީ އޮފް އިސްލާމިކް އެފެއާޒްގައި މިކަމަށްޓަކައި ކުރިއަށްދިޔަ ހަރަކާތުގައެވެ.
ރާއްޖޭގެ ޒަކާތު ހައުސްގެ ނަމުގައި ސަރުކާރުގެ އިދާރާއެއް ގާއިމުކުރެއްވީ، ދިވެހިރާއްޖޭގެ ޒަކާތުގެ ނިޒާމު ހަރުދަނާކުރުމުގެ މަސައްކަތާއި، ޒަކާތުގެ ނަފާ އޭގެ ބެހެނިވެރިންނަށް ފުޅާ ދާއިރާއެއްގައި ލިބޭނެގޮތަށް ޒަކާތު ފަންޑު ތަރައްގީކުރުމުގެ ބޭނުމުގައި ކަމަށް ސަރުކާރުން ބުނެއެވެ.
ރައީސް އޮފީހުން ބުނީ، ރާއްޖޭގެ ޒަކާތު ހައުސްގެ މަސައްކަތްތަކުގެ ތެރޭގައި ޒަކާތް ބަލައިގަތުމުގެ އިންތިޒާމު ހަމަޖެއްސުމާއި، ޒަކާތް ޙައްޤުވާ ފަރާތްތަކަށް ޒަކާތް ދޫކުރުމުގެ އިންތިޒާމުތައް ހަމަޖެއްސުން ހިމެނެއެވެ. އަދި ކޮންމެ ހަ މަހަކުން އެއްފަހަރު މުދަލު ޒަކާތުގެ ނިޞާބު އިޢުލާނުކުރުމާއި، ކަމާބެހޭ އިދާރާތަކާ ގުޅިގެން، ފަގީރުންނާއި މިސްކީނުންގެ ދަފުތަރު އެކުލަވައިލައި އަދާހަމަކޮށް ބެލެހެއްޓުމުގެ މަސައްކަތްވެސް ހިމެނޭ ކަމަށް އެ އޮފީހުން ބުނެއެވެ.
މީގެ އިތުރުންވެސް މި މުވައްސަސާގެ ތެރެއިން ޒަކާތުގެ އިލްމު ފެތުރުމާއި، ޒަކާތުގެ ހުކުމްތަކާމެދު އާންމުންނާ ވިޔަފާރިތަކާ ދައުލަތުގެ އިދާރާތައް ހޭލުންތެރިކުރުން ހިމެނޭ ކަމަށާއި، އަދި ހަމަ އެއާއެކު މިއަދު ޒަކާތް ލިބިގަންނަ މީހާ މާދަމާ ޒަކާތް ނެރޭ ތަނަވަސް މީހަކަށް ބަދަލުކުރުމުގެ އަޒުމުގައި މުހިންމު އިޖުތިމާއީ ޕްރޮގްރާމްތައް ހިންގުންވެސް ރާއްޖޭގެ ޒަކާތު ހައުސްގެ މަސައްކަތްތަކުގެ ތެރޭގައި ހިމެނޭ ކަމަށްވެސް ރައީސް އޮފީހުން ބުނެއެވެ.
ޒަކާތަކީ އިސްލާމްދީން ބިނާވެފައިވާ 5 އަސާސުގެތެރެއިން އެއް އަސާސެވެ. ކީރިތި ގުރުއާނުގައި ޒަކާތުގެ ވާހަކަ 33 ފަހަރު ބަޔާންވެފައިވެއެވެ. އިސްލާމީ ޝަރީއަތުގައި ޒަކާތް ޝަރުއުކުރައްވައި ޝަރީއަތުގެ އަސާސެއްކަމުގައި ކަނޑައެޅުއްވުމުގެ ހިކުމަތަކީ އިޖުތިމާއީ އަދާލަތު ގާއިމުކުރުމެވެ. ދޭދޭ ފަރުދުން އެކަކު އަނެކަކަށްޓަކައި ބާއްވަންޖެހޭ އުހުއްވަތްތެރިކަމުގެ ގުޅުން އޭގެ އެންމެ މަތީ ދަރަޖައިގައި ގާއިމުކުރުމަށް މަގުފަހިކުރުމެވެ. ޒަކާތުގެ ނިޒާމު ޝަރީއަތުގައި ކަނޑައަޅުއްވާފައިވަނީ ދައުލަތުން އިސްވެ ގާއިމުކުރަންޖެހޭ ޝަރުއީ އަދި ދީނީ އަސާސީ ޚިދުމަތެއްގެ ގޮތުގައެވެ. ކަނޑައެޅިފައިވާ މިންވަރު ޒަކާތް ވާޖިބުވާ ފަރާތްތަކުގެ އަތުން ނަގައި އަދުލުވެރިކަމާއެކު ޒަކާތުގެ ހައްގުވެރިންނަށް ފޯރުކޮށްދިނުމަކީ އިސްލާމީ ވެރިކަމުގެ ޒިންމާއެކެވެ.
