“ސްޓެލްކޯ ނޮލެޖް ހަބް”ގެ ނަމުގައި ސްޓޭޓް އިލެކްޓްރިކް ކޮމްޕެނީ ލިމިޓެޑުން ޚާއްސަ ޙަރަކާތެއް އިފްތިތާޙުކޮށްފިއެވެ.
ހޯމަ ދުވަހު ސްޓެލްކޯގެ ހެޑް އޮފީހުގައި ބޭއްވި ރަސްމިއްޔާތެއްގައި މި ޙަރަކާތް އިފްތިތާޙުކޮށްދެއްވީ އެ ކުންފުނީގެ މެނޭޖިންގ ޑިރެކްޓަރ ޙުސައިން ފަހުމީއެވެ.
ސްޓެލްކޯއިން ސިފަކުރި ގޮތުގައި ސްޓެލްކޯ ނޮލެޖް ހަބަކީ އިޖާދީ ވިސްނުން ކުރިއަރުވައި ޚިދުމަތުގެ އެންމެ މަތީ ގިންތިއަށް ވާޞިލްވުމަށް އެ ކުންފުނިން ކުރަމުންދާ މަސައްކަތުގައި ކުރިއަށް އެޅި މުހިއްމު ފިޔަވަޅެކެވެ.
ސްޓެލްކޯއިން ބުނީ މި ޙަރަކާތަކީ މުވައްޒަފުންގެ މެދުގައި ނަފްސު ތަރައްޤީ ކުރުމުގެ ރޫޙާ، ބަދަހިކަމާއެކު ގުޅިގެން ކުރިއަރައި ކާމިޔާބަށް ވާޞިލްވުމުގެ ފިކުރު އަށަގެންނެވުމުގެ ނިޔަތުގައި ކުންފުނީގެ ހިއުމަން ރިސޯސަސް އެންޑް ޓްރެއިނިންގ ޑިޕާޓްމަންޓުން ފެށި ޙަރަކާތެއް ކަމަށެވެ.
މި ޕްރޮގްރާމްގެ ދަށުން ސްޓެލްކޯގެ މުވައްޒަފުންގެ ފެންވަރު މަތިކުރުމަށް އެކި ޙަރަކާތްތައް ހިންގުމަށް އެ ކުންފުނިން ވަނީ ރާވާފައެވެ. އެގޮތުން މި ޕްރޮގްރާމްގެ ދަށުން މުވައްޒަފުންގެ ތެރޭގައި އެކި ދާއިރާތަކުގެ ޓްރެއިނަރުންގެ ޕޫލެއް އުފައްދައި، ޓެކްނިކަލް އަދި ނޮންޓެކްނިކަލް ދާއިރާތަކުން މުވައްޒަފުން ތަމްރީނުކޮށް ބިނާކުރުމުގެ މަސައްކަތް ކުރުމަށް ވަނީ ހަމަޖެހިފައެވެ.
މީގެ އިތުރުން ކޮންމެ މަހަކުވެސް ކޮންމެވެސް ދާއިރާއެއްގެ ތަޖުރިބާކާރަކު އޭނާގެ ތަޖުރިބާ ޙިއްސާ ކުރުމުގެ ސެޝަނެއް ހިންގުމަށް ވަނީ ހަމަޖެހިފައެވެ.
ސްޓެލްކޯ ނޮލެޖް ހަބް އިފްތިތާޙު ކުރުމުގެ ގޮތުން ބޭއްވި ރަސްމިއްޔާތުގައި މި ޕްރޮގްރާމްގެ ފުރަތަމަ މެހުމާނުންގެ ގޮތުގައި ސްޓެލްކޯގެ މުވައްޒަފުންނާއި ތަޖުރިބާ ޙިއްސާ ކުރެއްވީ ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީ އާއި މަޝްޙޫރު ކޯޕަރޭޓް ޓްރެއިނަރ މުޙައްމަދު މިސްތޯހްއެވެ.
ސްޓެލްކޯއިން ގެންދަނީ އެ ކުންފުނީގެ މުވައްޒަފުންނަށް އެކި ދާއިރާތަކުން ތަޢުލީމާއި ތަމްރީނުދީ، މަސައްކަތުގެ މާޙައުލުގެ ތެރެއިން މުވައްޒަފުންގެ ފެންވަރު ރަނގަޅު ކުރުމަށް އެކިއެކި ޕްރޮގްރާމްތައް ރާވައި ހިންގަމުންނެވެ. އެގޮތުން ދާދި ފަހުން ސްޓެލްކޯއިން ވަނީ އެ ކުންފުނިން ޚިދުމަތްދޭ ހުރިހާ ރަށްރަށުގެ ސްޓޭޝަން މެނޭޖަރުންނަށް އަމާޒުކޮށްގެން ޕްރޮފެޝަނަލް ޑިވެލޮޕްމަންޓް ޓްރެއިނިންގއެއް ވެސް ހިންގާފައެވެ.
