ޒަމާނަށް އައި ކުރިއެރުމާއި، ދިރިއުޅުމުގެ ވައްޓަފާޅިއަށް އައި ބަދަލުތަކާއިއެކު އެއާކޮންޑިޝަނަރ ނުވަތަ އޭސީ އަކީ މިހާރު އަޅުގަނޑުމެންގެ ދިރިއުޅުމުގެ މާހައުލަށް ބޭނުންވާ އަސާސީ އާލާތަކަށް ވަނީ ވެފައެވެ. ޚާއްޞަކޮށް ދިވެހިރާއްޖެ ފަދަ ހޫނު ޤައުމުތަކުގައި އޭސީގެ ބޭނުން އިންތިހާއަށް ބޮޑެވެ. ނަމަވެސް އޭސީ ބޭނުންކުރުމުގެ ސަބަބުން ކަރަންޓު ބިލު ބޮޑުވެ، ގިނަ ބައެއްގެ ޖީބަށް ބުރަވެއެވެ. އެހެންކަމުން، އޭސީއެއް ގަންނަން ނިންމާއިރު، ދުރު މުސްތަޤުބަލަށް ވިސްނައި، އެންމެ އެކަށޭނަ އޭސީއެއް އިޚްތިޔާރު ކުރުމަކީ މުހިންމު ކަމެކެވެ.
ހަކަތައިގެ ޚަރަދު ކުޑަކުރުމަށް ބަލަންވީ ކަންކަން
އޭސީއެއް ގަތުމުގައި އެންމެ މުހިންމު އެއް ކަމަކީ އެނަރޖީ އެފިޝަންސީއަށް ބެލުމެވެ. އެގޮތުން ރާއްޖޭގައި ނަމަ، އެނަރޖީ އެފިޝަންސީ ރަމްޒުކޮށްދިނުމަށް ބޭނުންކުރަނީ 'ހަކަތަރި' ނިޒާމެވެ. އެހެންކަމުން އޭސީއެއް ގަތުމުގައި އެއީ ހަކަތަރި ރޭޓިންގއެއް ލިބިފައިވާ އޭސީއެއް ކަމާއި، ލިބިފައިވަނީ ހަކަތަރީގެ ކޮން ގިންތިއެއްތޯ ބެލުމަކީ މުހިއްމު ކަމެކެވެ. މި ނިޒާމު ފަރުމާކުރެވިފައިވާ ގޮތުން، ހަކަތަރި ރޭޓިންގ މަތިވާ ވަރަކަށް ދައްކައިދެނީ އެ އޭސީއެއްގެ (ނުވަތަ އެހެންވެސް އިލެކްޓްރިކް އާލާތެއްގެ) ސަމަކާރަކަން (އެފިޝަންސީ) އިތުރުވާ މިންވަރެވެ. މީގެ އިތުރުން މި ލޭބަލްގައި އެ އާލާތެއް އަހަރެއްގެ މައްޗަށް އެވަރެޖްކޮށް ބޭނުންކުރާ ކަރަންޓުގެ ތަފްޞީލުވެސް ހިމެނިފައިވާނެއެވެ.
އިންވަރޓަރ ޓެކްނޮލޮޖީގެ މުހިންމުކަން
އިންވަރޓަރ ޓެކްނޮލޮޖީ ބޭނުންކުރާ އޭސީތަކަކީ އާންމު އޭސީތަކާ އަޅާބަލާއިރު ކަރަންޓު ޚަރަދު ވަރަށް ބޮޑުތަން ކުޑަ އޭސީތަކެކެވެ. އިންވަރޓަރ އޭސީތަކުގައި ހުންނަ ޚާއްޞަ ކޮމްޕްރެސަރުގެ ސަބަބުން، ކަނޑައެޅިފައިވާ ފިނިމިނަށް ކޮޓަރި ފިނިވުމުން، އޮޓަމެޓިކުން ކޮމްޕްރެސަރުގެ ސްޕީޑު ދަށްވެ، ކަރަންޓު ޚަރަދު ކުޑަވެގެންދެއެވެ. މީގެ އިތުރުން، އިންވަރޓަރ އޭސީތަކުގެ އުމުރުވެސް އާންމު އޭސީތަކަށްވުރެ ދިގުވެއެވެ.
ކޮޓަރީގެ ބޮޑުމިނާއި އެކަށޭނަ އޭސީ
އޭސީއެއް ގަތުމުގެ ކުރިން ކޮޓަރީގެ ބޮޑުމިނަށް ބެލުމަކީ މުހިންމު ކަމެކެވެ. ކޮޓަރީގެ ބޮޑުމިނަށްވުރެ ކުޑަ އޭސީއެއް ބޭނުންކުރުމުން އެދެވޭ ފިނިކަން ނުލިބި، އޭސީ ގިނަ ވަގުތު މަސައްކަތްކުރަން ޖެހުމުގެ ސަބަބުން ކަރަންޓު ބިލު ބޮޑުވާނެއެވެ. ހަމައެހެންމެ، ބޮޑު އޭސީއެއް ކުޑަ ކޮޓަރިއެއްގައި ބޭނުންކުރުމަކީވެސް ހަކަތަ އިސްރާފުވާނެ ކަމެކެވެ.
ބްރޭންޑާއި ފެންވަރު
އޭސީއެއް ގަތުމުގައި އިތުބާރުހުރި ބްރޭންޑެއްގެ އުފެއްދުމެއް އިޚްތިޔާރުކުރުމަކީ މުހިންމު ކަމެކެވެ. ފޭކު ނުވަތަ ދަށް ފެންވަރުގެ އޭސީތައް އަގު ހެޔޮކަމުގައި ވިޔަސް، މަރާމާތަށް ގިނަ ޚަރަދެއް ހިނގުމާއި، ހަކަތަ ބޭކާރުވުން ފަދަ މައްސަލަތައް ދިމާވެއެވެ. އިތުބާރުހުރި ބްރޭންޑުތަކުގެ އޭސީތަކުގައި އެނަރޖީ އެފިޝަންސީގެ އިތުރުން ވޮރަންޓީ ލިބުމާއި، ސްޕެއަރ ޕާޓްސް ލިބުން ފަސޭހަވުމަކީ ވެސް މުހިންމު ކަމެކެވެ.
ރާއްޖޭގެ މޫސުމަށް އެކަށޭނަ މޯޑުތައް
ރާއްޖޭގެ މޫސުމަކީ ހޫނު އަދި ތެތް މޫސުމަކަށްވުމާއެކު، މި މޫސުމާ ގުޅޭގޮތަށް ޑިޒައިންކޮށްފައިވާ އޭސީއެއް އިޚްތިޔާރުކުރުން މުހިންމެވެ. ޑިހިއުމިޑިފިކޭޝަން މޯޑު، ޓަރބޯ މޯޑު، އަދި ސްލީޕް މޯޑު ފަދަ އެކި މޯޑުތައް ހުރުމުން، އެކި ވަގުތުތަކުގައި އެންމެ އެކަށޭނަ ގޮތަށް އޭސީ ބޭނުންކުރެވޭނެއެވެ. މިފަދަ މޯޑުތަކުގެ ބޭނުން ހެޔޮގޮތުގައި ހިފުމުން ކަރަންޓު ޚަރަދު ކުޑަކުރެވޭނެއެވެ.
މެއިންޓެނަންސްގެ މުހިންމުކަން
އޭސީއެއް ގަތުމަށްފަހު އޭގެ މެއިންޓެނަންސްއަށް އަހައްމިއްޔަތުކަން ދިނުމަކީވެސް މުހިންމު ކަމެކެވެ. މަދުވެގެން ތިން މަހުން އެއްމަހު އޭސީ ސާފުކޮށް، ފިލްޓަރުތައް ދޮވެ، ގަވާއިދުން ސަރވިސްކުރުމުން އޭސީގެ އުމުރު ދިގުވެ، ހަކަތައިގެ ޚަރަދު ކުޑަވާނެއެވެ. އަދި މިކަމުގެ ސަބަބުން ބޮޑެތި މަރާމާތުތަކުން ސަލާމަތްވެވޭނެއެވެ.
ޚުލާސާކޮށް ބަލާއިރު، އޭސީއެއް ގަތުމުގައި ހަކަތައިގެ ފެންވަރު، އިންވަރޓަރ ޓެކްނޮލޮޖީ، ކޮޓަރީގެ ބޮޑުމިން، ބްރޭންޑުގެ އިތުބާރު، އަދި މޫސުމާ ގުޅޭ ޚާއްޞަ މޯޑުތަކަށް ބެލުމަކީ މުހިންމު ކަމެކެވެ. މިކަންކަމަށް ސަމާލުކަން ދިނުމުން ދުރު މުސްތަޤުބަލުގައި ކަރަންޓު ބިލު ކުޑަކުރުމަށް މަގުފަހިވެގެންދާނެއެވެ. އަދި އޭސީގެ އުމުރު ދިގުވެ، މަރާމާތުގެ ޚަރަދުތައްވެސް ކުޑަވެގެންދާނެއެވެ.
