ކުރިޔަށް އޮތް ދައުރުގައި ގދ.ވާދޫގެ ބޮޑެތި މަގުތައް ހަދައި، 100 އެނދުގެ ހޮޓަލަކާއި، ސްޕޯޓްސް ކޮމްޕްލެކްސްއެއް އަޅައިދޭނެ ކަމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރިޔާސީ އިންތިހާބުގެ ކެމްޕޭނަށް ވާދޫއަށް ވަޑައިގެން ރަށުގެ ރައްޔިތުންނާ ބައްދަލުކުރައްވާ ރައީސް ސޯލިހު ވިދާޅުވީ، ވާދޫގައި ފެނާއި ނަރުދަމާގެ ނިޒާމު ނިމުމުން އަންނަ ދައުރުގައި އެ ރަށުގައި ބޮޑެތި މަގުތައް ޒަމާނީ ފެންވަރަށް ތަރައްގީ ކުރާނެ ކަމަށާއި، އަދި ސްޕޯޓްސް ކޮމްޕްލެކްސްއެއްގެ އިތުރުން ސަރަހައްދީ ފެންވަރުގެ ވޮލީ ކޯޓެއްވެސް އަޅައިދޭނެ ކަމަށެވެ.
ވާދޫ ސްކޫލަށް ބޭނުންވާ އެޑްމިން ބިލްޑިންގެ އިތުރުން ސިއްހީ މަރުކަޒު އަޕްގްރޭޑްކުރުމަށް އިތުރު ބްލޮކްތައް ގާއިމުކުރާނެ ކަމަށާއި، އަދި 100 އެނދުގެ ހޮޓަލެއް ތަރައްގީކޮށް، ފަތާ ސަރަހައްދެއްވެސް ގާއިމުކޮށްދޭނެ ކަމަށް ރައީސް ސޯލިހު ވަނީ ވިދާޅުވެފައެވެ.
މީގެއިތުރުން ރައީސް ސޯލިހު ވިދާޅުވީ، ރަށުގައި ގެދޮރުވެރިކަމަށް ބޭނުންވެފައި ތިބި މީހުންނަށް ރޯހައުސް ނުވަތަ ފްލެޓް އަޅައިދޭނެ ކަމަށާއި، ކުރިޔަށް އޮތް ދުވަސްތަކުގައި ވާދޫއަށް ބޮޑެތި ބަދަލުތަކެއް އަންނާނެ ކަމަށެވެ. އަދި ވާދޫ ރައްޔިތުން ތިބީ އުފާވެރި އަމާންރާއްޖެއަކަށް ދިޔުމަށް ކަމަށްވެސް ރައީސް ވަނީ ވިދާޅުވެފައެވެ.
