ރާއްޖޭގައި ރާޅުން ހަކަތަ އުފެއްދޭނެ ގޮތްތައް ހޯދުމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ދިރާސާ ކުރަން ފަށައިފިއެވެ.
ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީ އެކްސްގައި ވިދާޅުވީ، މިއީ ރާއްޖޭގައި ބޭނުންކުރާ ހަކަތައިގެ 33 އިންސައްތަ އިއާދަކުރަނިވި ހަކަތައަށް ބަދަލުކުރުމަށް ރައީސް ޑރ. މުއިއްޒު އިޢުލާނުކުރައްވާފައިވާ އަމާޒަށް ވާޞިލްވުމަށް އެ ކުންފުނިން ހިންގާ ޕްރޮޖެކްޓެއް ކަމަށެވެ.
ފަހުމީ ވިދާޅުވީ ސްޓެލްކޯއިން މިހާރު އަމާޒު ހިފާފައިވަނީ އިރުގެ އަވިން އުފައްދާ ހަކައިގެ އިތުރުން، ދެމެހެއްޓެނިވި، ތިމާވެއްޓާއި ރައްޓެހި އެކިއެކި ގޮތްތައް ބޭނުންކޮށްގެން ރާއްޖޭގައި ހަކަތަ އުފެއްދޭނެ ގޮތްތައް ހޯދުމަށް ކަމަށެވެ.
މޫސުމާއިއެކު، އިރުގެ އަވިން އުފައްދާ ހަކަތައިގެ ނިސްބަތަށް އަސަރު ކުރިނަމަވެސް، ރާޅުން ނުވަތަ ކަޑުގެ އޮއެ ބޭނުންކޮށްގެން ހަކަތަ އުފެއްދުމަކީ މޫސުމުގެ ސަބަބުން އެއަށް އަސަރުކުރާ މިންވަރު ކުޑަ ގޮތެއްކަން ފާހަގަކުރައްވާ ފަހުމީ ވިދާޅުވީ، ކ. ގުޅީ ބޭރަށް ސްޓެލްކޯއިން ފައްތާފައިވާ ވޭވްބޯއީއިން މިހާރު މިކަމަށް ބޭނުންވާ މަޢުލޫމާތު އެއްކުރަމުންދާ ކަމަށެވެ.
ސްޓެލްކޯގެ ކަރަންޓު ގްރިޑްގައި އިއާދަކުރަނިވި ހަކަތައިގެ ހިއްސާ އިތުރުކޮށް، އެ ކުންފުނީގެ ކާބަން ފުޓްޕްރިންޓް ކުޑަކުރުމަށް އެ ކުންފުނިން ދަނީ ގިނަ މަސައްކަތްތަކެއް ކުރަމުންނެވެ.
